ޤުރުއާން މުބާރާތުގެ ބަިވެރިންނަށް މަރުޙަބާ ކިޔުން - ފޮޓޯ: މުޙައްމަދު ޢަލީ |
ހައްދުންމަތީ އަތޮޅު ކައުންސިލުން އިންތިޒާމުކޮށްގެން ޤައުމީ ޤުރުއާން މުބާރާތަށް ކުދިން ހޮވުމަށް ބާއްވާ "ލ. އަތޮޅު ޤުރުއާން މުބާރާތް 2013" މާދަމާ ހެނދުނު ލ. މާވަށުގައި ފެށުމަށް އެންމެ ފަހުގެ ތައްޔާރީތައް ވަމުން އެބަގެންދެ އެވެ.
ޖުމުލަ 59 ދަރިވަރުން ބައިވެރިވެފައިވާ މި މުބާރާތަކީ އަތޮޅު ކައުންސިލުން އިންތިޒާމުކޮށްގެން ބާއްވާ ތިންވަނަ ޤުރުއާން މުބާރާތް ކަމަށް މަޢުލޫމާތު ލިބެއެވެ. މިފަހަރުގެ މުބާރާތުގައި ބައިވެރިވެފައިވަނީ މުންޑޫ، ގަން، މާވަށް އަދި ފޮނަދޫ އިން ނެވެ.މި މުބާރާތް ފެށުމުގެ ރަސްމިއްޔާތު މާދަމާ ހެނދުނު 07:45 ގައި މާވަށު ސްކޫލް ހޯލުގައި ކުރިއަށް ދާނެއެވެ.
މުބާރާތުގައި ދަރިވަރުން ކިޔެވުމަށް ހަމަޖެހިފައިވަނީ ތިން ދަންފަޅިއަކަށެވެ. އެގޮތުން މާދަމާ (11 އޭޕްރީލް 2013) ވަނަ ދުވަހު 8:00 އިން 12:00 އަށް ކިޔެވުމަށް ހަމަޖެހިފައިވަނީ 6،9،11 އަދި 13 އަހަރުން ދަށުގެ ދަރިވަރުންގެ ބަލައިގެން ކިޔެވުމުގެ ގޮފީގެ ދަރިވަރުންނެވެ.
ބަލައިގެން ކިޔެވުމުގެ ގޮފީގެ އުމުރުން 13،16 އަދި 19 އަހަރުން ދަށުގެ ދަރިވަރުން ކިޔެވުމަށް ހަމަޖެހިފައިވަނީ މާދަމާ (11 އޭޕްރީލް 2013) ވަނަ ދުވަހު މެންދުރުފަހު 13:30 ން 18:00 އާއި ދެމެދު އޮންނަ ދަންފަޅީގައެވެ.
މާދަމާރޭގެ ދަންފަޅި އޮންނާނީ 20:30 ން 22:30 އަށެވެ. މި ދަންފަޅީގައި ކިޔެވުމަށް ހަމަޖެހިފައިވަނީ ހިތުން ކިޔެވުމުގެ ގޮފީގެ ދަރިވަރުންގެ ތެރެއިން 11،13 އަދި 16 އަހަރުން ދަށުގެ ދަރިވަރުންނެވެ.
12 އޭޕްރީލް 2013 ވަނަ ދުވަހުގެ ދަންފަޅިތަކަށް ބަލާލާއިރު، ހެނދުނު 08:30 ން 11:30 އަށް އޮންނަ ދަންފަޅީގައި ކިޔަވާނީ 6،7 އަދި 8 އަހަރުން ދަށުގެ ދަރިވަރުން ހިތުން ކިޔެވުމުގެ ގޮފިންނެވެ.
މުބާރާތް ނިންމުމުގެ ރަސްމިއްޔާތު އެޖެންޑާ ކޮށްފައިވަނީ 12 އޭޕްރީލް 2013 ވަނަ ދުވަހު ހަވީރު 16:15 އަށެވެ. މީގެ އިތުރުން 20:30 ގައި ބައިވެރިންނަށް ބާއްވާ ފަރިއްކޮޅެއް ހަމަޖެހިފައި ވާކަމަށްވެސް މަޢުލޫމާތު ލިބެއެވެ. އަދި އެއަށްފަހު ކައުންސިލްތަކުގެ ހަވާސާ ބައްދަލުވުމެއްވެސް ހިމެނެއެވެ.
މުބާރާތުގައި ރަށްރަށުން ބައިވެރިވާ ދަރިވަރުންނާއި އޮފިޝަލުން އަދި ބެލެނިވެރިން މާވަށުން ފުރުމަށް ހަމަޖެހިފައި 13 އޭޕްރީލް 2013 ވަނަ ދުވަހު ހެނދުނު 07:30 ގައެވެ.
No comments: