އެމަނިކުފާނު ފުރަތަމަ ތަޢުލީމު ހާސިލުކުރެއްވީ މަޖީދިއްޔާ ސްކޫލުންނެވެ. އޭގެ ފަހުން ސްރީލަންކާގެ އޯވަސީސް ސްކޫލް އޮފް ކޮލަމްބޯ އިން ސެކަންޑަރީ އެޑިޔުކޭޝަން އޯޑިނަރީ ލެވެލް ސެޓްފިކެޓް ހާސިލުކުރައްވާ، އިނގިރޭސިވިލާތުގެ ޑޯންޓްސޭސް ސްކޫލް ، ވިލްޓްޝަޔަރ އިން ހަޔަރ އެޑިޔުކޭޝަން ، އެޑްވާންސް ސެޓްފިކެޓް ހާސިލުކުރެއްވިއެވެ. އިނގިރޭސިވިލާތުގެ ލިވަޕޫލްގައި ހުންނަ ޖޯން މޯރްސް ޔުނިވަރސިޓީ އިން 1989 ވަނަ އަހަރުގެ ޖުލައިމަހު މެރިޓައިމް ސްޓަޑީސް އިން ބީއޭ ހާސިލުކުރެއްވިއެވެ.
ރައީސް މުޙައްމަދު ނަޝީދު މަޝްހޫރުވެފައިވަނީ " އަންނި " ގެނަމުންނެވެ. އަންނިއަކީ ނޫސްވެރިއެކެވެ. ލިޔުންތެރިއެކެވެ. ސިޔާސީ ކުށްތަކުގައި ތުހުމަތުކުރެވި ހައްޔަރުކޮށް އަދި ބައެއް ކުށްތަކަށް ޝަރީޢަތުން ޙުކުމްކޮށް ޖަލަށްލައި އަރުވާލާފައިވެއެވެ.
އޭރު ރާއްޖޭގައި އޮތީ ބާރުތައް މަސްހުނިވެފައިވާ ނިޒާމެކެވެ. އެގޮތް ބަދަލުކޮށް، ރާއްޖެއަށް ޑިމޮކްރަސީ ގެނައުމަށް އަޑު އުފުއްލަވާ މަލްޓިޕާޓީ ޑިމޮކްރަސީއެއް ރާއްޖޭގައި ޤާއިމު ކުރެއްވުމަށް މުޙައްމަދު ނަޝީދުވަނީ ޖެހިލުންކުޑަ މަސައްކަތްޕުޅުތަކެއް ކުރައްވާ ކާމިޔާބު ހޯއްދަވާފައެވެ. ތިރީސް އަހަރުވީ ސަރުކާރު ބަދަލުކޮށް، ރާއްޖެއަށް ޑިމޮކްރަސީ ގެންނެވުމުގައި އެންމެ ކުރީ ސަފުގައި ހަރަކާތްތެރިވެވަޑައިގެންނެވީ މުޙައްމަދު ނަޝީދު އިސްވެ ހުންނަވައިގެން އުފެއްދެވި ސިޔާސީ ޕާޓީއަކީ އެމްޑީޕީއެވެ. 2008 ނޮވެމްބަރ 11 ވަނަ ދުވަހު ރާއްޖޭގެ ރައީސުލްޖުމްހޫރިއްޔާ ކަމާ ޙަވާލުވެވަޑައިގެންނެވި ގ. ކެނެރީގޭ މުޙައްމަދު ނަޝީދަކީ ރައްޔިތުންގެ މަޖިލިހުގެ މާލޭ މެންބަރުކަންވެސް ކުރައްވާފައިވާ ބޭފުޅެކެވެ. އެމަނިކުފާނުގެ އަނބިކަބަލަކާއި ދެ ބޭފުޅުން އެބަތިއްބެވިއެވެ. އަނބިކަނބަލުންނަކީ މ. ޔާގޫތުގޭ ލައިލާ ޢަލީ ޢަބްދުﷲ އެވެ.
ރައީސް މުޙައްމަދު ނަޝީދަށް 46 އަހަރު މިއަދު ފުރިގެންދާއިރު އެމަނިކުފާނަކީ ދިވެހި ރާއްޖޭގެ ދެވަނަ ޖުމްހޫރިއްޔާގެ 3 ވަނަ ރައީސެވެ. އަދި ރާއްޖޭގެ ތާރީޚްގައި އެންމެ ފުރަތަމަ ފަހަރަށް ގިނަ ޕާޓީތައް އެކުލެވޭ ގޮތަށް ބޭއްވި އިންތިޚާބުން ކާމިޔާބުވެ ވަޑައިގެންނެވި ފުރަތަމަ ރައީސްވެސް މެއެވެ.
މުޙައްމަދު ނަޝީދުގެ ވެރިކަމުގެ ތިންވަނަ އަހަރު ސިޔާސީ ބައެއް ފަރާތްތަކާއި ސިފައިންނާއި ފުލުހުންގެ ތެރެއިން މަދުބަޔަކު ބައިވެރިވެގެން ހިންގި ޢަމަލުތަކުގެ ސަބަބުން އެ ވަގުތަށް ދިވެހި ރައްޔިތުންނާއި ޤައުމަށް އެންމެ ފައިދާ ބޮޑުގޮތަކީ ވެރިކަމުން އިސްތިޢުފާ ދެއްވުންކަމަށް ވިދާޅުވެ އިސްތިޢުފާ ދެއްވިއެވެ.
ރައީސް ނަޝީދަކީ މި ހިނގާ 2013 ވަނަ އަހަރު އޮންނަ ރިޔާސީ އިންތިޚާބްގައި އެމްޑީޕީގެ ފަރާތުން ރައީސްކަމަށް ވާދަކުރައްވާ ކެންޑިޑޭޓެވެ.
No comments: