ގައުމީ ޔުނިވަސިޓީގެ ކެމްޕަހެއް ލ. ގަމުގައި ހުޅުވާފައި ވާއިރު 142 ކުދިންނަށް ޖާގަ ދީފައިވާ
ގަމު މަތިމަރަދޫ ސްކޫލު ހިންގި އިމާރާތުގައި ޔުނިވަސިޓީގެ ކެމްޕަސް ވަގުތީ ގޮތުން ގާއިމުކޮށްފައިވާ އިރު އެތަނުން މި ޓާމް ހަތަރު ދާއިރާއަކުން ކޯސްތައް ފެށުމަށް ވަނީ ހަމަޖެހިފަ އެވެ. އޭގެ ތެރޭގައި ނާސިން އާއި އިސްލާމިކް ސްޓަޑީޒް އާއި ޓީޗިން އަދި އިނގިރޭސި ބަސް ހިމެނެ އެވެ.
ކެމްޕަސް ހުޅުވުމަށް މިދިޔަ ހޯމަ ދުވަހު ލ. ގަމުގައި ބޭއްވި ރަސްމިއްޔާތުގައި ޔުނިވަސިޓީގެ ޗާންސެލަރު ޑރ. މުހައްމަދު ޒާހިރު ހުސައިން ވިދާޅުވީ ދަނޑުވެރިކަމާއި މަސްވެރިކަމަށް އަމާޒުކޮށްގެން އެތަނުގައި ވަރަށް އަވަހަށް ކޯސްތައް ފަށާނެ ކަމަށާއި އެކަމުގެ ސަބަބުން ރާއްޖޭގެ ދަނޑުވެރިކަމާއި މަސްވެރިކަމުގެ ސިނާއަތަށް ހެޔޮ ބަދަލުތަކެއް އަންނާނެ ކަމަށް ގަބޫލު ކުރައްވާ ކަމަށެވެ. އަދި ކަނޑުގެ ދިރާސާ އާއި ކަނޑުގެ އުފެއްދުންތަކަށް ދިވެހިން ހާއްސަ ސަމާލުކަމެއް ދޭން ޖެހިފައިވާ ކަމަށް ވެސް ޒާހިރު ވިދާޅުވި އެވެ.
އެ ރަސްމިއްޔާތުގައި ޔުނިވަސިޓީގެ ވައިސް ޗާންސެލަރު ޑރ. ހަސަން ހަމީދު ވިދާޅުވީ ހައްދުންމައްޗަކީ ބިމުގެ ގޮތުންނާއި އާބާދީގޮތުން ޔުނިވަސިޓީގެ ކެމްޕަހެއް ގާއިމު ކުރުމަށް ވަރަށް އެކަށީގެންވާ އަތޮޅެއް ކަމަށެވެ.
ހޯމަ ދުވަހު ހުޅުވި ކެމްޕަހަކީ ވަގުތީ ގޮތުން ހުޅުވި ތަނެއް ނަމަވެސް ވަރަށް އަވަހަށް ދާއިމީ އިމާރާތެއް އެތަނުގައި އެޅުމަށް ވަނީ ހަމަޖެހިފަ އެވެ.
"ގަމުގައި ޔުނިވަސިޓީން ގާއިމުކުރާ ދާއިމީ ބޮޑު ކެމްޕަހަކީ މުސްތަގްބަލުގައި ނަމޫނާ ކެމްޕަހަކަށް ވެގެންދާނެ. އަދި މި ކެމްޕަހުގެ ސަބަބުން ހައްދުންމަތީގެ ރައްޔިތުންނަށް އިލްމީ، އިޖްތިމާއީ އަދި އިގްތިސާދީގޮތުން އެތައް ކުރިއެރުންތަކެއް ގެނެސްދޭނެ،" ހަސަން ވިދާޅުވި އެވެ.
ގަމުގެ އިތުރުން ހދ. ކުޅުދުއްފުއްޓާއި ގދ. ތިނަދޫގައި ވެސް ޔުނިވަސިޓީގެ ކެމްޕަސްތައް ހުރެ އެވެ.
thankolhey mauloomaathu muhsandhi kohlaigen khabaru liye bala.kulhudhufuhtaai thenadhooga ekani tha MNU ge campus tha huree ??
ReplyDelete