 |
| ކުނަހަންދޫ ބަނދރު ކޮނުމުގެ މަސައްކަތް ކުރިއަށް ދަނީ - ފޮޓޯ: މުއީޒް |
ދައުލަތުގެ ދަރަނި ކުޑަކުރުމަށް އަދިވެސް ގިނަ މަސައްކަތްތަކެއް ކުރަން ޖެހިފައިވާ ކަމަށް ވިދާޅުވެ، މިރޮނގުން ވާހަކަފުޅު ދައްކަވަމުން، ރައްޔިތުންގެ މަޖިލީހަށް ހުށަހެޅިފައިވާ ރެވެނިއު ބިލްތައް ފާސްކޮށްދެއްވުމުން، މިކަމަށް ވަރަށްބޮޑު ލުޔެއް ލިބިގެންދާނެކަން ރައީސް ފާހަގަކުރެއްވިއެވެ. އަދި ރާއްޖެއިން ފުރާ ބިދޭސީންގެ އަތުން ނަގާ ސަރވިސް ޗާރޖް ބޮޑުކުރެއްވުމަށް ސަރުކާރުން ރައްޔިތުންގެ މަޖިލީހަށް ހުށަހެޅުއްވި ބިލު، އިއްޔެ މަޖިލީހުން ބޭރުކޮށްލާފައިވާތީ، އެކަމަށް އިޝާރާތް ކުރައްވަމުން، ސަރުކާރުގެ ބަޖެޓަށް އާމްދަނީ ލިބޭނެގޮތް ހެދުމަކީ، ރައްޔިތުންގެ ފަސޭހައަށްޓަކައި ސަރުކާރުން ކުރައްވާ ކަމެއް ކަމުގައި ވިދާޅުވިއެވެ.
ރައީސްގެ ވާހަކަފުޅުގައި، އެމަނިކުފާނު ސަރުކާރާ ޙަވާލުވެވަޑައިގެންނެވިއިރު، ވަރަށް ބޮޑެތި ދަރަނި އޮތް ކަމަށާއި، އެހެން ނަމަވެސް، މިވޭތުވެދިޔަ ދޮޅުއަހަރުގެ ތެރޭގައި، މި ދަރަނީގެ ވަރަށްބޮޑު ބައެއް ދައްކާފައިވާ ކަމުގައި ވިދާޅުވެ، އެކަމުގެ ތަފްޞީލު ހާމަކުރެއްވިއެވެ.
ކުނަހަންދޫ ބަނދަރު ހެދުމުގެ މަސައްކަތް ފަށްޓަވައިދެއްވުމުގެ ރަސްމިއްޔާތުގައި ރައީސް ދެއްކެވި ވާހަކަފުޅުގައި، ބަނދަރު ހެދުމަކީ ކޮންމެ ރަށެއްގައިވެސް ކުރަންޖެހޭ ކަމެއް ކަމަށާއި، ރާއްޖޭގެ ޙާލަތު ހުރިގޮތުންނާއި އަދި ފުދުންތެރިކަން ހުރިގޮތުން، ރަށްރަށުގައި ބަނދަރު ހެދެމުންނުދާ ކަމުގައި ވިދާޅުވިއެވެ. ކުނަހަންދޫ ބަނދަރު ހެދުމުގެ މަސައްކަތް ފަށްޓަވައިދެއްވުމަކީ، ލިބިވަޑައިގަންނަވާ ވަރަށްބޮޑު އުފާފުޅެއް ކަމަށް ވިދާޅުވެ، ބަނދަރުގެ މަސައްކަތް ކުރައްވަމުން ގެންދަވާއިރު، ރައްޔިތުންނާ މަޝްވަރާ ކުރައްވައިގެން، ވަރަށް ރަނގަޅަށް ސަރވޭ ކުރައްވައިގެން، ރަށަށް ގެއްލުން ނުލިބޭގޮތަށް، މި މަސައްކަތް ކުރައްވަމުން ގެންދެވުމަށް ރައީސް އެދިވަޑައިގެންނެވިއެވެ.
ރަށްރަށުގެ ތަރައްޤީއަށްޓަކައި ކުރަންޖެހޭ ވަރަށްގިނަ ކަންތައްތައް އެބަހުރި ކަމަށާއި، މިގޮތުން، ނަރުދަމާގެ ނިޒާމު ޤާއިމުކުރުމަކީ، ރާއްޖޭގެ ތަރައްޤީއަށްޓަކައި ކުރަންޖެހޭ އެންމެ އިސް ކަންތައް ކަމުގައި ރައީސް ވިދާޅުވިއެވެ. ނަރުދަމާ ނިޒާމު ނެތުމަކީ، ފެންގަނޑު ތަޣައްޔަރުވެ، ފެންގަނޑު ލޮނުވަމުންދާ ކަމެއް ކަމަށް ވިދާޅުވެ، ރައީސް ވާހަކަފުޅު ދައްކަވަމުން، މޫސުމަށް އަންނަ ބަދަލުތަކާއި، ކަނޑުގެ ލޮނުގަނޑު އުސްވުމާއި، ޖައްވު ހޫނުވުމާ، މިކަންކަމުގެ އަސަރު ރާއްޖެއަށް ވަރަށް ބޮޑަށް ކުރަމުން ގެންދާކަންވެސް ފާހަގަކުރެއްވިއެވެ. ރާއްޖޭގައި މީހުން އުޅޭ ރަށްރަށުގެ ތެރެއިން 113 ރަށް ވަރަށް ބޮޑަށް ގިރެމުންދާ ކަމަށާއި، މިކަމުން ސަލާމަތްވުމަށްޓަކައި ކުރަންޖެހޭ ގިނަ ކަންތައްތަކެއް އެބަހުރި ކަމުގައި ރައީސް ވިދާޅުވިއެވެ. އަދި ރަށްރަށުގައި ހިންގޭ މިފަދަ މަޝްރޫޢުތައް ހިންގަންވާނީ، ރަށަށް ގެއްލުން ނުލިބޭގޮތަށް ކަމުގައިވެސް ރައީސް ވިދާޅުވިއެވެ.
No comments: