މިއީ ސިޔާސީ ވުމެއް ނޫނެވެ. މިއީ މުރުތައްދު ވުމުގެ ސިފައެކެވެ.

މާތްﷲ ގެ ކުޅަދުންވަންތަކަމުގެ މަތިވެރިކަމުން އެކަލާނގެ އުފައްދަވާ އަޅުގަނޑުމެންނަށް ރިޒުޤު ކުރައްވާފައިވާ ތަކެތީގައިވަނީ ތަފާތު ކުލަތައް ޖައްސަވާ އެކުލަތަކަކީ އެ އެއްޗަކަށް އެންމެ ގުޅޭ އެންމެ ކަމުދާ ކުލަ ކަމުގައި ލައްވާފައެވެ. މަތީގައިވާ ފޮޓޯއިން އެފެންނަނީ މާތްﷲ ގެ ކުޅަދުންވަންތަކަމުގެ މިއުސޫލަށް ގޮންޖަހާ އެބައި މީހުން އެކަނލާންގެއަށް މަލާމާތްކުރުން ނޫން ފަހެ ކޮންކަމެއް ބާއެވެ. މިއީ މި ރާއްޖޭގެ ކޮންމެވެސް ރަށެއްގެ މަދު ބޭފުޅުންކޮޅެއްގެ ހާލަތު އަދު ހުރި ގޮތެވެ.

އެއްދުވަހަކު އަޅުގަނޑަށް މީހަކު ކިޔައިދިން ވާހަކައަކުންވެސް އަޅުގަނޑުގެ ދުލުކުރިން ޝަހާދަތުގެ މަތިވެރި ކަލިމަ ކިޔާލެވުނީ ލިބުނު ހައިރާން ކަމާއެކުގައެވެ. އެމީހާ ބުނާގޮތުން އެދުވަހު އެގެއަށް ދިޔަ މި އަތޮޅު ރަށެއްގެ މެދު ޢުމުރަށްދާ އަންހެނަކު ކުރެން މިރަށުގައި ކީއްހޭ ތިކުރަނީ އަހާލުމުން ބުނިކަމަށްވަނީ މިއުޅެނީ އަހަރުމެންގެ ރައީސް (ކުރީގެ ރައީސް) ބަލަން އައިހޭ، އެނޫން ފަރާތެއް މަށަކަށް މިހާރަކު ނެތޭ! 

މިވާހަކަ އަޑުއިވުމުން އަޅުގަނޑު ރަޙްމަތްތެރިޔާ އެމީހާ ކައިރީ ބުނީ “ތިހެން ބުނާކަށް ނުވާނޭ، އަހަރަމެން ހެއްދެވި ފަރާތް އެބަވެޔޭ.” މިހެން ބުނީމާ އެ އަންހެން މީހާ ބުނިކަމަށްވަނީ “ތިފަރާތުގެ ވާހަކަ ނުދައްކާށޭ. އެއަށްވުރެން އެމަނިކުފާނު މުހިންމޭ” މިހެންނެވެ.

މިކަހަލަ އެހެން ވާހަކައެއްވެސް ހިއްސާކޮށްލާނަމެވެ. މިއަތޮޅުގެ ބައެއް ގޭގޭގައި އެގޭގެ އެންމެ އިސް އަންހެން ބޭފުޅުން ނަމާދުކުރާ ކޮޓަރީގައި ކުރީގެ ވެރިޔާގެ ބޮޑު ދެ ފޮޓޯގަނޑު ބަހައްޓައިގެން ނަމާދު ކުރަމުން އެބަގެންދެއެވެ.

މި މަޒުމޫނު ލިޔަން ފަށަމުން އިޝާރާތްކުރި ފޮޓޯ ގަނޑުގެ ވާހަކައިގައި އެވާފަދަ ދަށު ދަރަޖައިގެ ވިސްނުން ގެންގުޅޭ އެތައް ބަޔަކު މިރާއްޖޭގައި، މިއަތޮޅުގައި އަދި މިރަށުގައިވެސް އެބައުޅެއެވެ. އެގޮތުން ކައްކަން ބޭނުންކުރާ “ރީނދޫ” ބޭނުން ނުކުރުމާއި ދޮންރުކު ކުރުނބާ ނުބުއިމާއި ސްކޫލަށް ދަރިވަރުން ގެންދާ ކުލަފޮށިން ރީނދޫކުލަ އުނިކޮށްފައި ދަރިން ފޮނުވުން ހިމެނެއެވެ. މިހެން ގޮސް މިފަދަ އެތައް ކަމެއް ލިސްޓްކުރެވެން އެބަހުއްޓެވެ. މިދެންނެވި ފަދަ ގޮތަށް ޢަމަލުތައް ބަހައްޓަވާ ބޭފުޅުންނަކީ “ޔެލޯ ފޯބިއާ” ނުވަތަ ރީނދޫ ކުލަދެކެ ބިރުގަންނަ ބައެއް ކަމަށް އަޅުގަނޑަށް ސިފަކުރެވެއެވެ.

ސިޔާސީ މައިދާނުގައި ކަންކަން ހިނގަންވީ މިފަދަ ގޮތަކަށްބާވައެވެ؟ އެއްބަޔަކު ނޫކުލަ ދެކެ ބިރުގަނެފައި އަނެއް ބަޔަކު ރީނދޫކުލަ ދެކެ ބިރުން އުޅެން ޖެހޭބާވައެވެ؟ އޭރު ރީތިވީ ފިޔާތޮށި ކުލަ މިއަދު ސިޔާސީ ޕާޓީއަކުން ނެގުމުން އެކުލަ ހަޑިވުން މިއީ ހަމަޖެހޭ އުޞޫލެއްތޯއެވެ. ފިޔާތޮށި ފިނިފެންމަލުގެ ކުލަ ނޫކުލަޔަށް ނުވަތަ ރީނދޫ ކުލަޔަށް ބަދަލުވާނެތޯއެވެ؟ ނޫކުލައިގެ ކަނޑުތެރެއިން އޮޑި ދުއްވާފައި ދާއިރު އޮޑީގެ ކުރީގައި އެހެން އުޅަނދެއް އޮވެގެން ކަނޑުގައި ރީނދޫކުލަ ޖައްސަމުން ދިއުން މިއީ ބުއްދިވެރި ހަމަޖެހޭ ކަމެއްބާވައެވެ؟ ދޮންކެޔޮލާއި ދޮންއަނބާއި ދޮންފަޅޮލުން ރީނދޫކުލަ ކަނޑުވައި ނޫކުލަ ލައިގެން އުޅުންމިއީ ޤުދުރަތީ ޤާނޫނަށް މަލާމާތްކޮށް ފުރައްސާރަ ކުރުން ނޫންބާވައެވެ؟ ކާން ގެންގުޅޭ ކާނާއާއި ތަށި ސަމުސާ ނޫކުލައިން ނުވަތަ ރީނދޫ ކުލައިން ބެހެއްޓުން މިއީ ކޮންމެހެންވެސް ކުރުން ލާޒިމު ކަމެއް ބާވައެވެ؟ އަޅުގަނޑަށް ފެންނަ ފެނުމުގައި ދިވެހިން މިއަށްވުރެން ބޮޑަށް ސިޔާސީ މައިދާނުގައި އަރާއަރަފޯދެން ވެއްޖެއެވެ. އެހެންނޫނީ މިވެވެނީ ސިޔާސީއެއް ނޫނެވެ. މިވެވެނީ މުރުތައްދުނޫން އެހެން ކަމެއް ކަމަކަށް އަޅުގަނޑަކަށް ނުވިސްނެއެވެ.

ނަމަވެސް އަޅުގަނޑުމެންނަށް މިއަދު އުފާވެރިކަން ލިބެނީ މިފަދަ ބޯދާ ވިސްނުންތައް ދޫކޮށް، މާޒީއަކީ މާޒީކަން ގަބޫލުކުރާ މީހުން ގިނަވަމުންދާ ކަމުންނެވެ. އަޅުގަނޑުމެންނަށް ހިންހަމަ ޖެހުން ލިބެނީ މިއަތޮޅުގެ ރައްޔިތުން ވެސް މަޑުމަޑުން ޒަމާނީ ޑިމޮކްރަސީއަށް ލޯހުޅުވި އެ ޑިމޮކްރަސީ ދަންނަ މީހުންގެ ފަހަތުން މަސައްކަތްކުރުމަށް ތެދުވަމުންދާތީއެވެ. އަޅުގަނޑުމެންނަށް ޖޯޝް އަންނަނީ ރާއްޖޭގެ ޒުވާން ޖީލަށް ހެޔޮވެރިކަމެއް ކޮށްދެވޭނީ ކޮންބަޔަކަށް ކަން މޭރުންވަމުން އަންނާތީ އެވެ.