މިދިޔަ އަހަރު ފުލުހުންނަށް ހުށައެޅުނު މަރުގެ ހުރިހާ މައްސަލައެއްގެ ތަހުގީގު ނިންމާ ޕީޖީއަށް ފޮނުވާފައިވާކަން ހާމަކުރައްވާ ފުލުހުންގެ ސީރިއަސް އެންޑް އޮގަނައިޒް ކުރައިމް ޑިޕާޓްމަންޓުގެ ހެޑް ޗީފް އިންސްޕެކްޓަރު މުހަންމަދު ދާއޫދު ވިދާޅުވީ މައްސަލަތައް ޝަރީއަތަށް ހުށައެޅޭ ފަހުންވެސް ހެކި ނައްތާލުމަށް ބައެއް ފަރާތްތަކުން ހެކިންނަށް ނުފޫޒު ފޯރުވަމުން ގެންދާކަމުގައެވެ.
އަދި ހެކިންނަށް ނުފޫޒުފޯރުވާ ފަރާތްތައް ހޯދާ އަޅަންޖެހޭ ޤާނޫނީ ފިޔަވަޅެއް އަޅާނެކަމަށް ޔަގީންކަން ދެއްވާކަމަށްވެސް ދާއޫދު ވިދާޅުވިއެވެ.
ދާއޫދޫ ވިދާޅުވީ މަރުގެ މައްސަލަތަކަކީ އެންމެ އިސްކަމެއް ދީގެން ތަހުގީގު ކުރަމުންދާ މައްސަލަތައްކަމަށާއި މަރުގެ މައްސަލައެއް ހުށައެޅުމުން އެކަމުގެ އަސްލު ހޯދުމަށް ހުރިހާ ވަސީލަތްތަކެއް ބޭނުންކޮށްގެން ވަރަށް ގިނަ މަސައްކަތްތައް ކުރާކަމުގައެވެ.
މީގެ އިތުރުން މިދިޔަ އަހަރު ފުލުހުންނަށް ހުށައެޅުނު މަރުގެ ތަހުޤީގުކޮށް ޕީޖީއަށް ފޮނުވާފައިވާއިރު އެ ހުރިހާ މައްސަލައެއްވެސް ކޯޓަށް ހުށައެޅި ބައެއް މައްސަލަތަކުގައި އަދަބު ލިބެން ޖެހޭ ފަރާތްތަކަށް އަދަބު ލިބިފައިވާކަމަށްވެސް ދާއޫދު ވިދާޅުވިއެވެ.
އަދި މިދިޔަ އަހަރު ކުރެވުނު ބުރަ މަސައްކަތުގެ ނަތީޖާއެއްގެ ގޮތުން މިއަހަރުގެ މިހާތަނަށް މިފަދަ މަރުގެ އެއްވެސް މައްސަލައެއް ހުށައެޅިފައިނުވާކަމަށްވެސް ދާއޫދު ވިދާޅުވިއެވެ.
No comments: