 |
| ހަމަދު ސްކޫލުން މިއަހަރު ދަސްވެނިވި ދަރިވަރުން ސްކޫލްގެ ޕްރިންސިޕަލް އަދި ޒަކަރިއްޔާ މަންސޫރާއިއެކު - ފޮޓޯ: ހަމަދު ސްކޫލް |
ހަމަދު ސްކޫލުން މަތީ ޘާނަވީ ފުރިހަމަކުރި ދެވަނަ ބެޗްގައި 15 ދަރިވަރުން ދަސްވެނިވެފައި ވާކަމަށް އެ ސްކޫލްގެ ޕްރިންސިޕަލް މުޙައްމަދު ޝައުކަތު އެލްއޭ ނިއުސްއަށް މަޢުލޫމާތު ދެއްވަމުން ހާމަކުރެއްވި އެވެ. އިއްޔެރޭ ބޭއްވި ރަސްމިއްޔާތުގައި ހަމަދު ސްކޫލްގެ ގްރޭޑް 10، 11 އަދި 12 ގެ ދަރިވަރުންނާއި އެކުދިންގެ ބެލެނިވެރިން ޚާއްޞަކޮށް ދަޢުވަތު އެރުވިގެން ބައިވެރިކޮށްފައިވެ އެވެ.
މި ރަސްމިއްޔާތު ޝަރަފުވެރިކޮށްދެއްވަމުން ބްރިގޭޑިއާ ޖެނެރަލް ޒަކަރިއްޔާ މަންސޫރު ވާހަކަފުޅު ދެއްކެވެިއެވެ. އަދި މީގެ އިތުރުން ސްކޫލްގެ ޕްރިންސިޕަލް، މުދައްރިސެއް އަދި ދަސްވެނިވި ދަރިވަރެއް ވާހަކަދައްކާފައިވެ އެވެ. ޒަކަރިއްޔާ މަންސޫރުގެ ވާހަކަފުޅުގައި ދަސްވެނިވި ދަރިވަރުންނަކީ މުޖުތަމަޢު އަށް ބޭނުންތެރި، ޒިންމާދާރު މުވާޠިނުން ތަކަކަށް ވުމަށް އިލްތިމާސްކުރެއްވި އެވެ. އަދި ޚުލްޤު ރަނގަޅު ސުލޫކީ ދަރިންތަކަކަށް ވުމަށާއި، ދީނާއި ޤައުމުދެކެ ލޯބިވާ ޤައުމު އެދޭ ކޮންމެ ދަނޑިވަޅެއްގައި ޚިދުމަތަށް ނިކުންނަށް ކެރޭ ބަޔަކަށް ވުމަށްވެސް ގޮވާލެއްވިއެވެ. ޢިލްމަކީ ނިމުމެއް އޮތް އެއްޗަކަށް ނުދެކުމަށާއި ޢިލްމުގެ ފުރުސަތު ހުޅުވިފައި ވާހާ ހިނދަކު އޭގެ ބޭނުން ކުރުމަށްވެސް ޒަކަރަިއްޔާ މަންސޫރު ދަރިވަރުންނަށް އިލްތިމާސް ކުރެއްވިއެވެ.
ހަމަދު ސްކޫލްގެ ޕްރިންސިޕަލް ދަރިވަރުންނާ މުޚާޠަތު ކުރައްވާ ވަރަށް ޢިބްރަތްތެރި ދަރުސްއެއް ލިބިގެންދާފަދަ ވާހަކަފުޅެއް ދެއްކެވިއެވެ. ފިލާވަޅެއް ނަގައިދެއްވާ ގޮތަށް ދަރިވަރުން ޝައުޤުވެރިވާނެފަދަ ގޮތަކަށް ކުރިއަށްގެންދެވި ވާހަކައިގައި ކުދިން މުޖުތަމަޢަށް ނުކުމެ އަދި އަމިއްލަ ދިރިއުޅުމެއް ފެށުމަށްފަހު އެކުދިންގެ ދިރިއުޅުމުގެ ކަންތައްތައް ބައްޓަންކުރުމުގައި ވިސްނުން ބަހައްޓަންވީ ބައެއް ކަންކަން ފާހަގަ ކުރެއްވިއެވެ.
މި ރަސްމިއްޔާތުގައި ޚާއްޞަ މެހެމާނެއްގެ ގޮތުން މެލޭޝިޔާ އަށް ކަނޑައަޅުއްވާފައި ހުންނަވާ ދިވެހި ސަފީރު މުޙައްމަދު ޒަކީ (ނަޒާކީ ޒަކީ) ބައިވެރިވެލެއްވިއެވެ. ހަމަދު ސްކޫލުން ދަސްވެނިވި ދަރިވަރުން އެކުދިންގެ ހިތުގެ ޝުޢޫރުތައް ހާމަކުރުމަށް ޚާއްޞަ ލަވައެއްވެސް މި ރަސްމިއްޔާތުގައި ހުށައެޅިއެވެ.
No comments: