މާހެފުން ފާހަގަކުރުމުގެ ޘަޤާފަތް އުވިދިއުމަކީ ކަންބޮޑުވާކަމެއް!

މާހެފުންދުވަސް ފާހަގަކޮށް މާހެފުން ކައި އުޅުމަކީ މީގެ އެތަކެއް އަހަރެއް ކުރިން ފެށިގެން ރާއްޖޭގެ އެކި ރަށްރަށުގައި ކުރަމުން އަންނަ ޘަޤާފީ ކަމެކެވެ. އެކި ރަށްރަށުގައި މިކަން ފާހަގަކުރުމުގައި ބައެއްކަހަލަ ތަފާތުތައް ހުރިނަމަވެސް މާހެފުނަަށް ތައްޔާރުކޮށްއުޅުނު ކާބޯތަކެތި ތައްޔާރުކުރުމުގެ ވައްޓަފާޅިއާއި އެތަކެތި ކައިއުޅުނު ގޮތް ދާދިއެއްގޮތެވެ.

މާހެފުން ދުވަހަށް ތައްޔާރުވާގޮތާއި މާހެފުން ހަދާގޮތާއި މާހެފުންދުވަހު މަޖާކޮށް އުޅުނުގޮތް އަޅުގަނޑުގެ ހަނދާނުގައި ލ. ފޮނަދޫގައި ކޮށް އުޅުނުގޮތް މީގެ ކުރިން ވާނީ އެލްއޭ ނިއުސްގެ ކިޔުންތެރިންނަށާއި ފަންވަތް އިންފޯގެ ކިޔުންތެރިންނާއި ހިއްސާކޮށްފައެވެ.

މާހެފުންދުވަސް އޭރު ފާހަގަކޮށް އުޅުނުގޮތް މިހާރު އުވެމުން ނެތެމުން ދިއުމަކީ ހަމަ ގައިމުވެސް އަޅުގަނޑު ކަންބޮޑުވާ ކަމެކެވެ. މިކަމުގެ އިތުރުން އެހެނިހެން ޘަޤާފަތްތައްވެސް އުވެމުން ނެތެމުންދާކަމީ އެކަމާއި މެދު އަޅުގަނޑަށް ބުނެދޭން ނެގޭ ދެރައެއް ލިބޭ ކަމެކެވެ.

ކޮންމެއަކަސް މާހެފުން ދުވަސް މިހާރު ފާހަގަކޮށް އުޅޭގޮތް މި ލިޔުމުގައި ހިމެނުމަކީ ބަސަރާއަށް ކަދުރުވިއްކުން ފަދަ ކަމެއްކަމަށް ފެންނާތީ އެކަން ނުކޮށް މީގެ ދުވަސްތަކެއްކުރިން ލ. ފޮނަދޫގައާއި ރާއްޖޭގެ ބައެއް ރަށްރަށުގައި މާހެފުންދުވަސް ފާހަގަކޮށް އުޅުނުގޮތާއި މެދު ތައްޔާރުކޮށްފައިވާ ޑޮކިއުމެންޓްރީ ފިލްމެއް ހިމަނާލަމެވެ.