ގައުމެއްގެ ކުރިމަގު ކަމުގައިވާ އެގައުމެއްގެ ކިޔަވާކުދިންގެ ތައުލީމީ ފެންވަރު އަބަދު ވެސް ގުޅިފައި އޮންނަނީ އެކުދިންނަށް ކިޔަވައިދޭ މުދައްރިސުންގެ ފެންވަރުގެ މައްޗަށް ކަމަށް ވުމުން މުދައްރިސުންގެ ފެންވަރު ރަނގަޅު ކުރަން ޖެހޭ ކަމަށް އެޑިއުކޭޝަން މިނިސްޓަރު ޑރ. އާސިމް އަހްމަދު ވިދާޅުވެއްޖެ އެވެ.

މިއަދު ފާހަގަކުރަމުންދާ ބައިނަލް އަގްވާމީ ޓީޗަރުންގެ ދުވަހުގެ މުނާސަބަތުގައި އެޑިއުކޭޝަން މިނިސްޓަރު ނެރުއްވި ހިތާބެއްގައި ވިދާޅުވެފައި ވަނީ ހިދުމަތުގައި ތިއްބަވާ މުދައްރިސުންނަށް ޒަމާނާ އެއްގޮތަށް ތާޒާވުމާއި ތަމްރީން ހަލުވިކޮށް ދެވޭނެ އިންތިޒާމެއް ގާއިމުކުރުމަކީ ތައުލީމީ ފެންވަރު ރަނގަޅު ކުރުމަށް ކޮންމެހެން ކުރަންޖެހިފައިވާ ކަމެއް ކަމަށެވެ.

އަދި ޓީޗަރުންނަށް ތަމްރީނު ދިނުމަށް ގާއިމުކުރި އިންސްޓިޓިއުޓް އޮފް އެޑިއުކޭޝަން އިން ޓީޗަރުންނަށް އެފަދަ ގިނަ ފުރުސަތުތަކެއް ފަހިކޮށްދެމުން އަންނަ ކަމަށްވެސް އެޑިއުކޭޝަން މިނިސްޓަރ އާސިމް ވިދާޅުވިއެވެ

އޭގެ އިތުރަށް މުދައްރިސުން ކުރާ މަސައްކަތާ އެކަށީގެންވާ ރަނގަޅު އުޖޫރައެއް ކަނޑައަޅައި، އެމަސައްކަތުގެ އަގު ވަޒަންކުރުމާއި ހިދުމަތުގައި ދެމިތިބުމަށް ހިތްވަރު ލިބޭނެ ގޮތްތަކެއް ހަމަޖެއްސުމަކީ ކޮންމެހެން ކުރަން ޖެހޭ ވަރަށް މުހިއްމު ކަމެއް ކަމަށް ވެސް އެޑިއުކޭޝަން މިނިސްޓަރު ޑރ. އާސިމް އަހުމަދު ވިދާޅުވިއެވެ.