އަންހެނުންގެ ތަރައްޤީއަށް
މަސައްކަތްކުރާ ކޮމިޓީތަކުގެ އިންތިޚާބުގެ ކަންކަން ކުރިއަށްދާނެ ގޮތާއި
ގުޅޭގޮތުން، އެލްޖީއޭއިން އެކުލަވާލާފަޢީވާ
މަސައްކަތު ތާވަލްގައި ބުނެފަވަނީ،
އަންހެނުންގެ ކޮމިޓީތަކުގެ އިންތިޚާބުގައި ވާދަކުރުމަށް ބޭނުންވާ
ކެންޑިޑޭޓުންގެ އެޕްލިކޭޝަން ފޯމްތަކާއި، ހުށަހަޅަންޖެހޭ
ލިޔެކިޔުންތައް، ރަށްރަށާއި، އަތޮޅާއި، ސިޓީ
ކައުންސިލްތަކުގައި ޤާއިމުކުރެވޭ
އިންތިޚާބުގެ ކަންކަން ބަލަހައްޓާ ކޮމިޓީތަކަށް އެންމެ ލަސްވެގެން
އަންނަމަހުގެ ނުވަވަނަ ދުވަހުގެ ކުރިން ހުށަހަޅަން ޖެހޭނެ ކަމަށެވެ.
އެލްޖީއޭއިން ބުނީ، އިންތިހާބުގައި ވާދަކުރުމަށް ޝަރުތު ހަމަވާ ކެންޑިޑޭޓުންނަށް އަންނަމަހުގެ 15 ވަނަ ދުވަހު ލިޔުމުން އެންގުމަށްފަހު، ކެންޑިޑޭޓުންގެ ނަންތައް ތަރުތީބު ކުރުމަށް ގުރުއަތުލުމުގެ ކަންކަން ކުރިއަށް ގެންދިއުމަށް ހަމަޖެހިފައިވަނީ އަންނަ މަހުގެ 18 ވަނަ ދުވަހު ކަމަށެވެ.
އެލްޖީއޭއިން ބުނީ މިއިންތިހާބުގައި ވޯޓްލެވޭ މީހުންގެ ލިސްޓް އާންމު ކުރުމުން، އެލިސްޓުގައި އެއްވެސް މައްސަލައެއް އުޅޭނަމަ، އަންނަމަހުގެ 21 ވަނަ ދުވަހުގެ ކުރިން އިންތިހާބުގެ ކަންކަން ބަލަހައްޓާ ކޮމިޓީތަކަށް އެންގުމުން، ވޯޓްލާ މީހުންގެ ރަޖިސްޓްރީ އިސްލާހުކޮށް، އަންނަމަހުގެ 31 ވަނަ ދުވަހު އެލިސްޓް އާންމު ކުރާނެ ކަމަށެވެ.
އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިހާބުގައި ވޯޓްލުމާއި ނަތީޖާ އިއުލާން ކުރުމަށް ހަމަޖެހިފަވަނީ ކުރިއަށްއޮތް ނޮވެމްބަރު މަހުގެ 7 ވަނަ ދުވަހު ކަމަށްވެސް އެލްޖީއޭއިން ބުނެ އެވެ.
އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިހާބުގައި ވާދަކުރާ ކެންޑިޑޭޓުންގެ މައިގަނޑު ޝަރުތުތަކުގެ ތެރޭގައި ހިމެނެނީ، އިންތިހާބުގައި ވާދަކުރާ ދާއިރާގައި ރަށްވެހިވެ ދިރިއުޅޭ، އުމުރުން 18 އަހަރުގެ އަންހެނެއް ކަމުގައި ވުމާއި، ޖިނާއީ ކުށެއްގެ ހުކުމް ތަންފީޒު ކުރަމުންދާ މީހެއް ކަމުގައި ނުވުމާއި، ފުލްޓައިމްކޮށް ކިޔަވަމުންދާ ދަރިވަރެއް ކަމުގައި ނުވުމާއި، ރައްޔިތުން އިންތިހާބު ކޮށްފައިވާ އެއްވެސް މަޤާމެއް ފުރަމުންދާ މީހެއް ކަމުގައި ނުވުމެވެ.
No comments: