ފިލްމީ ބަތޮލް އަދި ޑައިރެކްޓަރު ރަވީ ފާރޫގު ޑައިރެކްޓްކޮށްފައިވާ ފިލްމު "އިނގިލި"ގެ ޓިކެޓް އޮލިމްޕަހުގައި ވިއްކަން ފަށައިފި އެވެ. 
ރަވީގެ އިތުރުން މަހުދީ އަހުމަދާއި ހުސެއިން މުނައްވަރުގެ ހިއްސާއާ އެކު އުފައްދާ ފިލްމާ ގުޅޭގޮތުން މަހުދީ ބުނީ ފިލްމު އެޅުވުމަށް އޮލިމްޕަސް ލިބިފައި ވަނީ އަންނަ މަހުގެ 16 އިން 26 އަށް ކަމަށެވެ. ފިލްމު ދެއްކުމަށް އޮލިމްޕަސް ލިބުނު މުއްދަތު ކުރުވުމުންނާއި އެ ފިލްމަކީ އެހެން ފިލްމުތަކާ ތަފާތު ފިލްމަކަށްވާތީ ޓިކެޓް ވިއްކާނީ 11 ދުވަހަށް ކަމަށް އޭނާ ބުންޏެވެ.

"މިއީ ވަރަށް ތަފާތު ސްޓައިލެއްގެ ފިލްމެއް. އެއް ލޮކޭޝަނެއްގައި ނަގާފައިވާ ދެ ފިރިހެނުން އުޅޭ ފިލްމެއް، ލަވައެއް މި ފިލްމުގައި ނުހުންނާނެ. އެހެންވީމާ ލަވަ ބަލަންދާ އޯޑިއަންސަށް އެހާ ކަމުދާނެހެނެއް ހިއެއް ނުވޭ،" އޭނާ ބުންޏެވެ.
މި ފިލްމަކީ މުޅިން އާ ތަޖުރިބާއަކަށްވާތީ އޮލިމްޕަހުގައި ގިނަ ޝޯތަކެއް ދައްކައިގެން ރިސްކު ނަގާކަށް ވެސް ފިލްމު އުފެއްދި ޓީމުން ބޭނުމެއް ނުވެ އެވެ. އެ ޓީމުން ކެތްމަދުވެފައި ތިބީ، އެއީ ބެލުންތެރިންނަށް ނުވަތަ ރާއްޖެއަށް ކަމުދާނެ ސްޓައިލެއްތޯ ޔަގީންކުރުމަށެވެ.

ފިލްމު އޮލިމްޕަހުގައި އެޅުވުމުގެ ކުރިން ބައެއް މީހުންނަށް ފިލްމު ދައްކައިގެން ހިޔާލު ހޯދީ ވެސް އެހެންވެގެންނެވެ.

"ވަރަށް ގިނަ ބަޔަކަށް ފިލްމު ދައްކައިފިން. ފިލްމީ ދާއިރާގެ ކުރީގެ ފަންނާނުންނާއި އެހެން ގޮސް ތަފާތު ބަޔަކަށް ދައްކައިފިން. ފިލްމު ބެލި އެންމެންނަށް ވެސް ވަރަށް ކަމުދޭ. ދެން އޮލިމްޕަހުގައި އެޅުވުމުން އިނގޭނީ އާއްމުންނަށް ކަމުދޭތޯ،" މަހުދީ ބުންޏެވެ.

އޮލިމްޕަހުގައި ދެއްކުމަށް ފަހު ބައެއް އަތޮޅުތަކުގައި ވެސް އެ ފިލްމު އަޅުވާގޮތަށް ވަނީ ހަމަޖައްސައިފަ އެވެ. އޭގެ އިތުރުން ކޮލަމްބޯގައި ވެސް އެ ފިލްމު އެޅުވުމުގެ ވިސްނަމުން އަންނަ ކަމަށް މަހުދީ ބުންޏެވެ.

އެ ފިލްމު ހަދާފައި ވަނީ 14 އަހަރުގެ ކުއްޖަކު ލިއެފައިވާ "ހޮޅުއަށީގެ އެކުވެރިޔާ" ވާހަކަ އަސްލަކަށް ބަލައިގެންނެވެ. ކ. ގުޅީގައި ޝޫޓްކޮށްފައިވާ އެ ފިލްމުގައި އުޅެނީ އެކްޓަރު އަބްދުﷲ މުއާޒް (މުއ) އާއި އިސްމާއިލް ރަޝީދު (ކޮޕީ އިއްސެ) އެވެ. އެ ދެ މީހުންނާއި އެ ދެ މީހުން ތިބޭ ހޮޅުއަށްޓަކީ އަދި އެރޭ ވާރޭވެހުމަކީ ވެސް ފިލްމުގެ ހާއްސަ ކަމެކެވެ.

"މި ފިލްމަކީ ސަސްޕެންސް ތްރިލާއެއް. މި ފިލްމުގައި އުޅޭ ދެ މީހުންގެ ތެރެއިން އެކަކު ގެންގުޅޭނީ ގިޕޯ ލައިޓަރެއް. އަނެކަކު އަތުގައި އޮންނާނީ ވަޅިއެއް. މުޅި ރޭއެއްކޮށް ވާރޭވެހޭނެ. މި ފިލްމުގައި ވާރެއަކީ ވެސް އަދި ލައިޓަރަކީ ވެސް ކެރެކްޓާއެއް،" ފިލްމުގެ ޑައިރެކްޓަރު ރަވީ ބުނެފައިވެ އެވެ.

ރަވީ އަދި މަޙްދީ ހިމެނިގެން ޑާރކް ރެއިން އެންޓަރޓެއިންމެންޓުން އުފައްދާފައިވާ މިފަދަ އެހެން ތްރިއްލާއެއް ކަމަށްވާ "މިކޮއެ ބައްޕަ ބައޭ ބައޭ" ވެސް ވަރަށް އަވަހަށް ސިނަމާތަކުން ފެނިގެން ޑާނެ ކަމަށް ބެލެވެއެވެ.