އެމްއެންޑީއެފްގެ އިސް ބޭފުޅަކު ސަރުކާރުގެ އިސްފަރާތަކަށް ހޫނު ބަސްތަކެއް ރައްދުކޮށްފިކަމަށް މަޢުލޫމާތު ލިބިއްޖެ

ކައްދޫގައި ހުންނަ އެމްއެންޑީއެފް ސެންޓްރަލް އޭރިއާ - ފޮޓޯ: ރައީސް އޮފީސް

ކައްދޫ އެއަރޕޯރޓް ކުންފުނީގެ މުވައްޒަފުންނަށް މިދިޔަ އޭޕްރީލްމަހުގެ މުސާރަ ދިނުން ލަސްވެގެން ކައްދޫގައި ހުންނަ ޤައުމީ ދިފާޢީ ބާރުގެ ސެންޓްރަލް ކޮމާންޑްގެ އިސް ބޭފުޅަކު ސަރުކާރުގެ އިސްފަރާތަކަށް ހޫނު ބަސްތަކެއް ރައްދުކޮށްފިކަމަށް ވަރަށް އިތުބާރު ހުރިގޮތަކަށް އެލްއޭ ނިއުސް އަށް މަޢުލޫމާތު ލިބިއްޖެ އެވެ.

މިކަން ހިނގާފައިވަނީ ކައްދޫ މުވައްޒަފުންނަށް މުސާރަ ނުދީ ލަސްވާތީ މީގެ ދެދުވަސްކުރިން ރާއްޖެ ޓީވީއަށް ކައްދޫ މެނޭޖަރާއި ބައެއް މުވައްޒަފުން މަޢުލޫމާތު ދީ ވީޑިއޯ ނަގާފައި ވަނިކޮށެއެވެ. އެލްއޭ ނިއުސް އަށް މަޢުލޫމާތު ދިން ފަރާތުން ބުނީ އެދުވަހު ރާއްޖެ ޓީވީއަށް މަޢުލޫމާތު ދިނުމުން ކައްދޫ މުވައްޒަފުންގެ މުސާރައިގެ ކަންތައް ވަރަށް އަވަހަށް ހަމަޖެހިގެން ދިޔަކަމަށެވެ. އަދި އެކަން އެވީ ވަރަށް ޕްރެޝަރު ބޮޑުވެގެން ކަމަށް މަޢުލޫމާތު ލިބިފައިވާކަމަށްވެސް އޭނާ ބުންޏެވެ.

"ކަންތައް ބޮޑުވި ވަރަކީ އެދުވަހު ކައްދޫ ގައި ހުންނަ އެމްއެންޑީއެފް ސެންޓްރަލް އޭރިއާގެ އިސް ބޭފުޅަކު ކޮންމެވެސް ފަރާތަކަށް (ބެލެވޭގޮތުން ސަރުކާރުގެ އިސް މަޤާމެއްގައި ހުންނެވި ބޭފުޅަކަށް) ގުޅާފައި ވަރަށް ބަވާލި. އޭނާ ބުނި ކިހާބޮޑު ބަލާއެއްހޭ _ _ މެންނަށް ވެރިކަން ޙަވާލުކޮށްފަ ދިނީމަވެސް ތިއުޅެނީ ޤައުމު ހިންގަން ނޭނގިގެންނޭ... މިހެން ކިޔާފަ ވަރަށް އެއްޗެތި ގޮވި." ނަން ހާމަކުރުމަށް އުޒުވެރިވަމުން އެމީހާ ކިޔައިދިނެވެ.

އެލްއޭ ނިއުސްއަށް މަޢުލޫމާތު ލިބިފައިވާގޮތުން ކައްދޫ މުވައްޒަފުންގެ ތެރެއިން ބައެއް މުވައްޒަފުންނަށް އޯފް ދުވަސް ދިނުމަށް ކޮންމްވެސް ފަރާތަކުން މިހާރުވަނީ އަންގާފައެވެ. އަދި މިކަމަކީ މިހާރު ވެރިކަމަށް އަރާވަޑައިގެން ހުންނެވި ވަހީދު ޙަސަން މަނިކުގެ ސަރުކާރުދެކެ މުވައްޒަފުން ރުޅިއެރުވުމަށް ކުރަން އަންގާފައިވާ ކަމެކެވެ. މީގެ އިތުރުން ކައްދޫގެ ބައެއް ހަރުމުދާ ވިއްކުމަށްވެސް އިޢުލާނުކޮށްފައި ވާކަމަށްވެސް މަޢުލޫމާތު ލިބެއެވެ.