ކްރިމިނަލް ކޯޓުގައި މިއަދު އޮތް ޝަރީއަތުގެ މަޖިލީހުގައި ކާކުކަން ނޭނގޭގޮތަށް އަޑުބަދަލުކޮށްގެން ހެކިބަސް ދެމުން އެމީހާ ބުނީ މިދިޔަ އަހަރުގެ މެއި މަހުގެ 30 ވަނަ ދުވަހުގެ ރޭ ފަތިހު ގާތްގަނޑަކަށް 4:45 އެހައިކަންހާއިރު ލ. މާވަށް އެވަބުލޫ މުހައްމަދު ވިސާމް އާއި ގދ. ގައްދޫ ގުންޒަރު މުހައްމަދު ސުފުޔާންގެ އިތުރުން ލ. މާވަށް އަސަރީގޭ މަންސޫރު ޔޫސުފް ސައިކަލްތަކެއްގައި ގޮސް ޕާކްތެރެއަށް ވަދެގަތް މަންޒަރު އޭނާ އަށް ފެނުނު ކަމަށެވެ.
ހެކިބަސް ދެމުން އެމީހާ ބުނީ ޕާކްތެރެއަށް ވަނުމަށް ފަހު އަރުހަމް ވަށާލައިގެން ތިބެ އެ މީހުންގެ ތެރެއިން ވިސާމް އަރުހަމްގެ މެޔަށް ވަޅިހެރި ތަނާއި އަދި އަރުހަމްގެ ފުރަގަހުގައި ހުރެ ސުފުޔާން އޭނާ އަށް ހަމަލާދިން މަންޒަރު ވެސް ވަރަށް ސާފުކޮށް ފެނުނު ކަމަށެވެ. ނަމަވެސް އެ މީހުންގެ ތެރެއިން މަންސޫރު އެއްވެސްކަމެއް ކުރިތަނެއް ނުފެންނަ ކަމަށް ވެސް އޭނާ ބުންޏެވެ.
ހަމަލާދިން ވަގުތު އަރުހަމް ހަޅޭލަވައިގަތް އަޑު އިވުނު ކަމަށް ވެސް ހެކިބަސްދިން މީހާ ބުންޏެވެ.
"ވިސާމް އަރުހަމްގެ މެޔާދިމާލަށް އެއްފަހަރު ވަޅި ހަރާލިތަން ދުށިން. ސުފުޔާން އަރުހަމްގެ ފުރަގަހުގައި ހުރެ އޭނާ އަށް ހަމަލާދިންތަން ވެސް ދުށިން. މަންސޫރު އަރްހަމް ކައިރީ ހުރި. އެކަމަކު އެއްވެސް ކަމެއް އޭނާ ނުކުރޭ. އަރުހަމް ހަޅޭލެއްވި އަޑު އިވުނު،" ތަކުރާރުކޮށް ޝަރީއަތުގައި ސުވާލު ކުރުމުން އެމީހާ ބުންޏެވެ.
އެ ތިން މީހުން ޕާކްތެރެއަށް ވަދެގެންދިޔައިރު މއ. ސީނަރީވިޔު އާތިފް ރަޝީދު ޕާކަށް ވަންނަ ގޯޅިގަނޑު ކުރިމަތީ ސައިކަލެއްގެ މަތީގައި އިންދާ ފެނުނުކަމަށް ވެސް ހެކިބަސްދެމުން އެމީހާ ބުންޏެވެ.
އެމީހާގެ އިތުރުން އެހެކިބަސްދިން އެހެން މީހަކު ވެސް ބުނީ ވިސާމް އާއި ސުފުޔާން އަދި މަންސޫރު ޕާކްތެރެއަށް ވަދެގަތް މަންޒަރު އޭނާ އަށް ފެނުނު ކަމަށާއި އެވަގުތު ސުފުޔާންގެ އަތުގައި ވަޅިއެއް އޮތްކަމަށެވެ.
ޕާކްތެރެއަށް ވަނުމަށްފަހު އެ ތިން މީހުން އަރުހަމްގެ ގައިގައި ހިފަހައްޓައިގެން ތިއްބާ ފެނުނުކަމަށް ވެސް ހެކިބަސްދިން އެ މީހާ ވަނީ ބުނެފަ އެވެ. ނަމަވެސް އެ މީހުން އޭނާ އަށް ހަމަލާދިން މަންޒަރު ނުފެންނަ ކަމަށް އޭނާ ވަނީ ބުނެފަ އެވެ.
"ސުފުޔާން ހުރީ އަރުހަމްގެ ގަމީހުގެ ގިރުވާނުގައި ހިފައިގެން. ވިސާމް ހުރީ ކުރިމަތީގައި. މަންސޫރު ވާތްފަޅިން އަރުހަމްގެ އަތުގައި ހިފައިގެން ހުރީ. އެވަގުތު ހަޅޭލައްވާ އަޑު އިވުނު،" އެމީހާ ބުންޏެވެ.
މިއަދު ހެކިބަސްދިން ތިންވަނަ މީހާ ބުނީ ތިން ސައިކަލެއްގައި ހަ މީހަކު ޕާކަށް ވަންނަ ގޯޅި ކުރިމައްޗަށް މަޑުކުރިތަނާއި އޭގެތެރެއިން ބައެއް މީހުން ޕާކްތެރެއަށް ވަދެގަތް މަންޒަރު އޭނާ އަށް ފެނުނު ކަމަށެވެ. ނަމަވެސް އެއީ ކޮންބައެއްކަމެއް ނޭނގޭ ކަމަށް ވެސް އޭނާ ބުންޏެވެ.
މިއަދުގެ ޝަރީއަތުގެ މަޖިލީސް ނިންމަވާލައްވަމުން ގާޒީ ވިދާޅުވީ އެ މައްސަލައިގެ އިތުރުއަޑުއެހުމެއް އޮންނާނީ އަންނަ މަހުގެ ފަސް ވަނަ ދުވަހު ކަމަށެވެ.
އުމުރުން 16 އަހަރުގެ އަރުހަމް އަކީ ދަރުމަވަންތަ ސްކޫލްގެ ގްރޭޑް 9 ގައި ތައުލީމް ހާސިލްކުރަމުން ދިޔަ ކުއްޖެކެވެ.
No comments: