ލ. ގަމުގައި ސައިކަލެއްގައި ދިޔަ މީހަކަށް ބަޔަކު ހަމަލާދީ މަރާލާފައި ވާތީ އެކަމާ ކަންބޮޑުވުން ފާޅުކޮށް އެ މައްސަލަ ސަރުކާރުގެ ސަމާލުކަމަށް ގެނައުމަށް ރައްޔިތުންގެ މަޖިލީހަށް ކުއްލި މައްސަލައެއް ހުށަހަޅައިފި އެވެ.

ރައްޔިތުންގެ މަޖިލީހަށް މިއަދު ކުއްލި މައްސަލަ ހުށަހަޅައްވަމުން މައްޗަންގޮޅި ދެކުނު ދާއިރާގެ މެންބަރު މުހައްމަދު ރަޝީދު ވިދާޅުވީ އެ މައްސަލަ ހުށަޅުއްވަން ޖެހުނީ ރާއްޖޭގައި ހިންގާ މަރުގެ ހާދިސާތައް އާންމުވެ، މުޅި ރާއްޖޭގެ އެކި ކޮންކޮޅުތަކުގައި އަމާންކަން ގެއްލިފައިވާތީ ކަމަށެވެ. އަދި އެކަމުގެ ސަބަބުން ރާއްޖޭގެ ރައްޔިތުންނަށް ސަލާމަތްތެރިކަން ނެތް ކަމަށް އޭނާ ވިދާޅުވި އެވެ.

ކުއްލި މައްސަލައަށް ބަހުސް ކުރައްވަމުން އެމްޑީޕީގެ ޕާލެމެންޓްރީ ގްރޫޕްގެ ނައިބް ލީޑަރު ތޮއްޑޫ ދާއިރާގެ މެންބަރު އަލީ ވަހީދު ވިދާޅުވީ މިހާތަނަށް ވެސް ރާއްޖޭގައި އަނިޔާވެރި ގޮތްގޮތަށް މީހުން މަރާލާފައިވާ މީހުންނަށް އަދަބު ދެވިފައި ނުވާ ކަމަށެވެ. އެގޮތުން އަނިޔާވެރި ގޮތަކަށް ޝަހީދުކޮށްލެވިފައިވާ ރައްޔިތުންގެ މަޖިލީހުގެ އުނގޫފާރު ދާއިރާގެ މެންބަރު ޑރ. އަފްރާޝީމް އަލީ މަރާލި މީހާ އަށް ވެސް އަދަބު ދެވިފައި ނުވާ ކަމަށް އަލީ ވަހީދު ވިދާޅުވި އެވެ.

އޭނާ ވިދާޅުވީ ޑރ. އަފްރާޝީމް މަރާލީ ކާކުކަމާއި އެކަމުގެ އެޑީގައި ތިބީ ކޮންބައެއް މިހާރުގެ ކޮމިޝަނަރު އޮފް ޕޮލިސް އަބްދުﷲ ރިޔާޒްއަށާއި ރައީސް ޑރ. މުހައްމަދު ވަހީދު ހަސަންމަނިކަށް އެނގިވަޑައިގަންނަވާނެ ކަމަށެވެ. އަދި ވިދާޅުވީ ރާއްޖޭގައި މަރަށް މަރު ހިފަން ޖެހޭނެ ކަމަށާއި އެކަން ނުކުރެވެންވީ އެއްވެސް ސަބަބެއް ނެތް ކަމަށެވެ.

ކުއްލި މައްސަލައަށް ބަހުސް ކުރައްވަމުން ރައީސް ޑރ. ވަހީދުގެ ޕާޓީ އަށް ނިސްބަތްވާ ތިމަރަފުށީ ދާއިރާގެ މެންބަރު އަހުމަދު ޝަރީފް ވިދާޅުވީ ވެރިކަން ބަދަލުވުމަށް ފަހު ރާއްޖޭގައި ހިނގާފައި މަރުގެ ތަފާތު އެކި ހާދިސާތަކާއި އަދި ހިނގަމުންދާ މަރުގެ ހާދިސާތަކުގެ ފަހަތުގައި ހުންނެވީ ކުރީގެ ރައީސް މުހައްމަދު ނަޝީދާއި އެމަނިކުފާނަށް ތާއިދުކުރާ ބޭފުޅުން ކަމަށެވެ. އެގޮތުން ޝަރީފް ވިދާޅުވީ މާރާމާރީ އަށް ހިތްވަރު ދެއްވައި ކުރީގެ ރައީސް ނަޝީދު ވާހަކުފުޅު ދައްކަވާފައިވާ ވީޑިއޯތަކާއި އޯޑިއޯތައް އާންމުވެފައިވާ ކަމަށެވެ. އަދި ޑރ. އަފްރާޝީމް މަރާލުމުގެ އަޑީގައި ތިބިކަމަށް ތުހުމަތު ކުރެވެނީ ވެސް އެމަނިކުފާނަށް ތާއިދު ކުރައްވާ ބޭފުޅުން ކަމަށް ޝަރީފް ވިދާޅުވި އެވެ.

އޭނާ ވިދާޅުވީ މުޖުތަމަޢު ތެރޭގައި ހިނގާ ހުރިހާ ފަސާދައާއި މާރާމާރީގެ އަސްލަކީ ކުރީގެ ރައީސް ނަޝީދު ކަމަށާއި އެފަދަ ހުރިހާ ލާއިންސާނީ ޖަރީމާތަކެއްގެ ފަހަތުގައި ހުންނެވީ އެމަނިކުފާނާއި އެމަނިކުފާނަށް ތާއިދު ކުރައްވާ ބޭފުޅުން ކަމަށެވެ. އެހެން ކަމުން މީހުން މެރުމާއި އެފަދަ ޖަރީމާތަކުގެ ވާހަކަ އެމްޑީޕީ އަށް ނިސްބަތްވާ ބޭފުޅުންނަަށް ނުދެއްކޭނެ ކަމަށް ޝަރީފް ވިދާޅުވި އެވެ.

ކުއްލި މައްސަލައަށް ބަހުސް ކުރައްވަމުން މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ ވިދާޅުވީ ތިމަރަފުށީ މީހުން މަރުގެ ވާހަކަތައް މަޖިލީހުގައި ނުދެއްކުމަށް ތިމަރަފުށީ ދާއިރާގެ މެންބަރު އަހުމަދު ޝަރީފް ވިދާޅުވީ ކޮމިޝަނަރު އޮފް ޕޮލިސް އަބްދުﷲ ރިޔާޒް އަންގަވައިގެން ކަމަށެވެ. އެހެން ކަމުން ޝަރީފް ދެއްކެވި ވާހަކަފުޅު ކުށްވެރި ކުރާ ކަމަށް އިމްތިޔާޒް ވިދާޅުވި އެވެ.

އިމްތިޔާޒް ވިދާޅުވީ ރާއްޖޭގައި މީހުން މެރުމާއި ހިންގާ ލާއިންސާނީ ޖަރީމާތައް ހުއްޓުމަކަށް ނައިސްގެން އުޅެނީ އެކަން ކަމުގެ އަޑީގައި ފުލުހުންގެ އިސްބޭފުޅުން ހިމެނޭތީ ކަމަށް އިމްތިޔާޒް ވިދާޅުވި އެވެ. އަދި ވިދާޅުވީ މީހުން މަރާމީހުންނާއި ލާއިންސާނީ ޖަރީމާތައް ހިންގާ މީހުންނަށް ފުލުހުންގެ އެހީތެރިކަން ލިބެމުންދާ ނަމަ އެކަންކަމަށް ހުއްޓުމެއް ނާންނާނެ ކަމަށް އޭނާ ވިދާޅުވި އެވެ.