ލ. ގަމުގެ ވާހަކަ ތާރީޚްގެ ތެރެއިން ބަލައިލައިއިރު ރާއްޖެ އިސްލާމްވެ އެތައް ދުވަހެއް ފާއިތުވެ ދިޔައިރުވެސް، ލ. އަތޮޅުގެ ގިނަ ރަށްރަށް ފަދައިން އޭރު ގަމުގައި އުޅުނު މީހުންވެސް އިސްލާމްދީން ޤަބޫލުކުރީ ވަރަށް ފަހުން ކަމަށް ފެންނާން އެބައޮތެވެ. ދިވެހި ރާއްޖޭގައި ސިޔާސީ ޕާޓީތައް އުފެދިގެން އައިއިފަހުންވެސް ލ. ގަމުގައި އެމްޑީޕީގެ ފިކުރު އޮތީ އާލާވާގޮތް ނުވެ ފާޑަކަށްކަމަށް ދެންނެވެން އެބައޮތެވެ.

ލ. ފޮނަދޫގައި އެމްޑީޕީގެ ޙަރަކާތްތައް ހިނގަންފެށިއިރު، އެމްޑީޕީގެ އަޑެއް ލ. ގަމުން ނުއިވެޔޭވެސް ދަންނަވާން ކެރެއެވެ. ނަމަވެސް މިއަދު މިވަނީ މަންޒަރު ބަދަލުވެފައެވެ. ކުލަ ބަދަލުވެފައެވެ. ފިކުރު ބަދަލުވެފައެވެ. ޕީޕީއެމްގެ ކުލަ ނުވަތަ 'މަޢުމޫނިޒަމް' އެ ރަށުން އެއްކޮށް ފޮހެވެން ކައިރިވެއްޖެ ކަމުގެ ކޮޅުމަތި ފެންނާން ފަށައިފިއެވެ.

މިހާރު ލ. ގަމުގައި އެމްޑީޕީ މެންބަރުން ހިންގާލާ ހަރަކާތްތައް ފެނިފައި އެމްޑީޕީއާއި އިދިކޮޅު ފިކުރުގެ މީހުންގެ މޭ ކަރާގޮތް ވާނެއެވެ. ހަމަ ގައިމުވެސް އެމްޑީޕީއާއި އެއްކޮޅު ފިކުރުގެ މީހުންނަށް މިހާރު ފެންނަމުންދާ މަންޒަރުތައް ފެނުމުން މެޔަށް ފިނިކަން ލިއްބައިދޭނެކަން ޔަޤީންކުރެވެ އެވެ. ހިތްތަކަށް އުފާވެރިކަން ގެނެސްދޭނެކަން ގައިމު ކުރެވެއެވެ. މުޅި ގަމުގެ މެޖޯރިޓީ އެމްޑީޕީއަށް ލިބިފައިވާކަން މުޖައްރިބު ކުރެވުނީ ރިޔާސީ އިންތިޚާބުގެ ފުރަތަމަ ބުރުގެ ނަތީޖާއިންނެވެ.

ލ. ގަމުގައި އެމްޑީޕީގެ ޙަރަކާތްތައް ފަތުއަޑު ކިޔާފައި ހިނގާންފެށީ ކީއްވެގެންކަން ވަރަށް ސާފެވެ. ގަމުގެ ރައްޔިތުންނަކީ 'ހެޔޮ ގޮތުގައި ވަޠަނީ ވާން ދަންނަ ބައެއް އުޅޭ ރަށެއް' ކަމުގައި އަޅުގަނޑު އަބަދުވެސް ސިފަކުރަމެވެ. އެއީ ފިސާރި ރަށް ވަންތަ ބައެކެވެ. ރަށަށް ތަރައްޤީއާއި ކުރިއެރުން ހޯދައިދިނުމުގެ ވިސްނުން އަބަދުވެސް ގަމުގެ ވެރިންނާއި ރައްޔިތުންގެ ކިބައިން ފެންނަމުންދާކަމީ ގަން އަދު މިދެކޭ ތަރައްޤީގެ ތަޅުދަނޑިއެވެ.

ކުރިން ދަންނަވާލިފަދައިން ގަމަކީ 2009 ހިސާބުގައިވެސް މާކަ އެމްޑީޕީ ތަނެެއް ނޫނެވެ. ނަމަވެސް އެމީހުން ހެޔޮގޮތުގައި ވާދަކުރާންފެށީ ފޮނަދޫގެ އެމްޑީޕީ މެންބަރުންނާއި ކަމަށް އަޅުގަނޑަށް އަބަދުވެސް ސިފަކުރެވޭ ބޮޑު މަންޒަރެއް ފެނެއެވެ. އެގޮތުން ލ. ގަމު އެމްޑީޕީ މެންބަރުން ދޭދޭ ފަރުދުންނާއިމެދު ގެންގުޅޭ ޒާތީ ތަޢައްސުބާ ކޮންމެވެސް ހިސާބެއްގައި ބާއްވާފައި ފޫގަޅާލީ އެމްޑީޕީ ތަނަކަށް ގަން ހެދުމުގެ ހިތްވަރުގަދަ ޢަޒުމާއި އެކުގައެވެ. މަޤާމެއް ހޯދުމަކަށް ނުވިސްނައެވެ. ކައުންސިލް އިންތިޚާބަށް ކުރިމަތިލުމަށް ނުވަތަ މަޖިލިސް އިންތިޚާބަށް ކުރިމަތިލުމަށް ނުވިސްނާ، ނުވަތަ އެވިސްނުން ވަގުތީގޮތުން އޮއްބާލުމަށްފަހު ގަމުގެ އެމްޑީޕީ މެންބަރުން މީގެ އަހަރުތަކެއްކުރިން 'ކުރިޔަށް ކުރިޔަށް ބާރަށް ކުރިޔަށް' ކެމްޕޭން އެ ރަށުގައި ޖައްސައިފިއެވެ. ހަމަ އެންމެ ޢަޒުމެއްގައެވެ. ބަޣާވާތަކުން ވައްޓާލެވުނު އެމްޑީޕީގެ ވެރިކަން އަނބުރާ ހޯދުމުގެ ނިޔަތާއި ޢަޒުމާއި އެކުގައެވެ.

ގަމުގެ ރައްޔިތުން އެކަން ދައްކަމުން އަންނަކަން ދިވެހި ރައްޔިތުންގެ ޑިމޮކްރެޓިކް ޕާޓިގެ ފަރާތުން ދަނެއެވެ. އެކަމުގެ އަގުވަޒަން ކުރެއެވެ. އަބަދުހެން އެމްޑީޕީގެ އިސްބޭފުޅެއް ނުވަތަ ބޭފުޅުންކޮޅެއް ގަމުން ފެންނަމުންދާ ދިޔުމުން މިދެންނެވި ކަމަށް ބާރުލިބެ އެވެ. ކޮންމެއަކަސް މިހާރު ލ. ގަމުގައި ބާއްވާ އެމްޑީޕީގެ ކޮންމެ ހަރަކާތަކުން ވަރަށް ގިނަ ޢަދަދަކަށް މީހުންފެންނަކަމީ ލ. ގަމުގައި އެމްޑީޕީގެ ހަރަކާތްތައް ފަތުއަޑު ކިޔާފައި ބާރަށް ކުރިއަށް އަންނަކަން ވިސްނާ ކޮންމެ މީހަކަށް ފެންނާން އޮތް ޙަޤީގަތެކެވެ.