ފެބްރުއަރީ ހަތެއް 2012 ގައި ކުރީގެ ރައީސް މުހައްމަދު ނަޝީދުގެ ވެރިކަން ބަދަލުކޮށްލާފައިވަނީ ބަޣާވާތަކުން ކަމަށާއި ކޮންމެ ވެސް ދުވަހަކުން އެމައްސަލަތައް ބެލޭނެ ކަމަށް އުންމީދު ކުރައްވާ ކަމަށް އޭރު މާލޭ އޭރިއާގެ ކޮމާންޑަރަކަށް ހުންނެވި ރިޓަޔާޑް ބްރިގޭޑިއަ ޖެނެރަލް އިބްރާހީމް ދީދީ ވިދާޅުވެއްޖެއެވެ.

މިއީ ފެބްރުއަރީ ހަތެއްގެ ހާދިސާއާއި ބެހޭ ގޮތުން އިބްރާހީމްދީދީ ރިޓަޔަ ކުރެއްވި ފަހުން ވާހަކަ ދެއްކެވި ފުރަތަމަ ފަހަރެވެ.

އައްޑޫގައި ހުންނަވައިގެން އޮންލައިން ނޫސް ސީއެންއެމަށް ފޯނުން ދެއްވި ބަސްދީގަތުމެއްގައި އިބްރާހީމް ދީދީ ވިދާޅުވީ، ފެބްރުއަރީ ހަތެއްގައި ވެރިކަން ބަދަލުކޮށްލާފައިވަނީ ގާނޫނާ ގަވާއިދާ ހިލާފަށް ފުލުހުންނާއި ސިފައިންގެ ތެރެއިން ބަޔަކު ނުކުމެ ޕްރެޝަރުކޮށްގެން ކަމަށެވެ. އަދި ރައީސް ނަޝީދު އިސްތިއުފާ ދެއްވީ އެހެން އެއްވެސް ގޮތެއް ނެތި މަޖުބޫރީ ހާލަތެއްގައި ރައްޔިތުންގެ ބަޔަކަށް ހަމަލާ ނުދިނުމަށް ކަމަށް ވެސް އިބްރާހީމް ދީދީ ވިދާޅުވިއެވެ.

އިބްރާހީމްދީދީ ވިދާޅުވީ އެކަމަކީ އޭރުގެ ޑިފެންސް މިނިސްޓަރު ތޮލްހަތު އިބްރާހީމް ކަލޭފާނާއި މިހާރުގެ ޑިފެންސް މިނިސްޓަރު މުހައްމަދު ނާޒިމާއި، މިހާރުގެ ޗީފް އޮފް ޑިފެންސް ފޯސް މޭޖަ ޖެނެރަލް އަހުމަދު ޝިޔާމް އިސްކޮށް ތިއްބަވައިގެން ހިންގެވި ކަމެއް ކަމަށެވެ.

"އަޅުގަނޑާއި އޭރުގެ ޗީފް މޭޖަ ޖެނެރަލް މޫސާ އަލީ ޖަލީލާއި ދިޔައީ ނެގޯޝިއޭޓް ކުރުމަށް ބަޔަކު ތިބި ވާހަކަ އެނގުމުން ރައީސް ނަޝީދު ވިދާޅުވެގެން. އަޅުގަނޑުމެންނާއި އެކު އޭރުގެ ބްރިގޭޑިއަ ޖެނެރަލް އަދި މިހާރުގެ ޗީފް އޮފް ޑިފެންސް ފޯސް ޝިޔާމް ވަޑައިގެންނެވި. ޝިޔާމް ވަޑައިގެންނެވީ އަމިއްލަފުޅަށް. ނާޒިމު ވިދާޅުވީ، ބަޑި ނުޖަހައްޗޭ. އަޅުގަނޑު ދެންނެވިން ބަޑި ޖަހަން ނޫޅެއޭ. އޭރު މިހާރުގެ ސީޕީ ރިޔާޒާއި ހޯމް މިނިސްޓްރީގެ ސްޓޭޓް މިނިސްޓަރު އެފްއޭ ފަޔާޒުއާއި ކައިރީގައި ތިއްބެވި.އަޅުގަނޑުމެން ކައިރީ ވިދާޅުވީ ޝަރުތަކާއި ނުލައި އިސްތިއުފާ ދެއްވުމަށް އެދޭ ކަމަށް. ދެން ފެނުނީ ޝަރުތަކާއި ނުލައި އިސްތިއުފާ ދިނުމަށް ގޮވާތަން. ދެން ތޮލްހަތުގެ އޯޑަރަކަށް ނާޒިމް އެތެރެއަށް ވަނީ، ނާޒިމާއި ތޮލްހަތު ބައްދަލުކޮށްފައި މުހުލަތެއް ދެން އެރުވީ. ދެން ފެންނަނީ ތޮލްހަތުގެ އިޒުނަ ލިބިގެން، ސައުންޑް ސިސްޓަމް ބޭނުންކޮށްގެން ވިދާޅުވީ ތިމަންނައޭ ހަވާލުވެ ހުރީ އަދި ތިމަންނަ ވަރަށް އަވަހަށް ސިފައިންގެއަށް މީހަކު އައްޔަން ކުރާނަމޭ. ޖަލީލު ހުންނަވަނިކޮށް އެކްޓިން ސީޑީއެފްކަން ޝިޔާމާއި ހަވާލު ކުރީ، ޝިޔާމް ހަވާލުވެ ވަޑައިގެންނެވީ އެއީ ސިފައިންގެ ގާނޫނާ ހިލާފު ކަމެއް،" އިބްރާހީމް ދީދީ ވިދާޅުވިއެވެ.

އިބްރާހީމްދީދީ ވިދާޅުވީ ކޯނީގައި ވެސް އެވާހަކަތައް ދަންނަވާފައިވާނެ ކަމަށެވެ. ނަމަވެސް ކޯނީން އެކަންތައްތަކަށް ރިއާޔަތްކޮށް ބަލާފައިވާ ކަމަށް ގަބޫލު ނުކުރައްވާ ކަމަށެވެ.

އިބްރާހީމް ދީދީވަނީ ރަބަރު ވަޒަން ޖަހަން ރައީސް ނަޝީދު އެނގެވި ކަމަށް ރައީސް ޑރ.މުހައްމަދު ވަހީދު ހަސަން މަނިކު ވިދާޅުވި ވާހަކަ ދޮގު ކުރައްވާފައެވެ.
އަދި ރޭ ޕީޕީއެމުން ބޭއްވި ބައްދަލުވުމުގައި، މިހާރު އޮތީ އަމާން ކަމަށާއި ނުރައްކަލަށް ވޯޓު ދޭން ޖެހިފައި ކަމަށް ޖުމްހޫރީ ޕާޓީގެ ލީޑަރު ގާސިމް އިބްރާހީމް ވިދާޅުވެފައިވާތީ އިބްރާހީމްދީދީވަނީ ކަންބޮޑުވުން ފާޅު ކުރައްވާފައެވެ.

"ރޭ ގާސިމް ވިދާޅުވީ މިހާރު މިއޮތީ އަމާން ކަމަށާއި ނުރައްކަލަށް ވޯޓުދޭން ޖެހިފައި، އެވިދާޅުވި އެއްޗެއްގެ މާނަ ވަރަށް ބިރުވެރި. އަޅުގަނޑު ގޮވާލަން ސިފައިންނާއި ފުލުހުންނަށް ވެސް ރައްޔިތުން ކޮންމެ ގޮތަކަށް ނިންމި ނަމަވެސް އިހްތިރާމް ކުރަން. އެހެން ނޫންނަމަ ވަރަށް ނުރައްކާތެރި ހާލަތަކަށްދާނެ. ގާސިމުއެހެން ގޮތަކަށް ވިދާޅުވިޔަސް ގައުމާއި ރައްޔިތުންގެ ނިންމުން ދިފާއުކޮށް ގާނޫނު އަސާސީއާއި ގާނޫނު ނެގެހެއްޓުން ދިފާއީ ބާރުގެ މައްޗަށް ގާނޫން ލާޒިމް ކުރޭ،" އިބްރާހީމް ދީދީ ވިދާޅުވިއެވެ.