އަންނަ ހޮނިހިރު ދުވަހު ބާއްވާ އިންތިޚާބުގެ ވޯޓުން "ބަޣާވާތުގެ" އަހުލުވެރިން ބަލިކުރައްވާނެކަމަށް އެމްޑީޕީގެ ރިޔާސީ ކެންޑިޑޭޓް އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

އެމްޑީޕީ "ވޯޓުން އުފާވެރިކަން" މިނަމުގައި ރޭ ރާޅުގަނޑުގައި ބޭއްވި ޖަލްސާގައި ވާހަކަފުޅު ދައްކަވަމުން ރައީސް ނަޝީދު ވިދާޅުވީ ހޮނިހިރު ދުވަހު ބާއްވަނީ ހަމައެކަނި އިންތިޚާބެއް ނޫންކަމުގައެވެ. ނަމަވެސް އެއީ ރައްޔިތުން ބޭނުންވާ ތަރައްޤީއާއި އުފާ ފާގަތިކަމަށް ކުރާ މަސައްކަތުގެ ނިމުންކަމުގައެވެ. އަދި އެމަސައްކަތުގައި އެއްބައި ފަހަރު މަތިން އަނެއްބައިފަހަރު ދަށުން ކަންކަން ވަމުން ދުވަހެއް ދުވަހަކަށް ރާއްޖޭގެ ރައްޔިތުން ގެންދަނީ ކާމިޔާބު ހޯދަމުންކަމަށްވެސް ރައީސް ނަޝީދު ވިދާޅުވިއެވެ.

"ރާއްޖޭރައްޔިތުން ދިގު ދަތުރެއްކޮށްފި، ޒަމާންތަކެއް ވަންދެއް އަނިޔާވެރިކަމުގަ އެރައްޔިތުން ދުވަސްތައް ހޭދަކޮށްފި، ރާއްޖޭގެ ރައްޔިތުން ދުވަހަކުވެސް އެރައްޔިތުންގެ އުއްމީދު ނަގައެއްނުލާ، މާޔޫސްވެއެއް ނުމެދޭ، ހިއްވަރާއި އެކުގައި ކޮންމެ ދުވަހަކު ކޮންމެ ދުވަހަކު އެރައްޔިތުން ދިޔައީ މަސައްކަތް ކުރަމުން" ރައީސް ނަޝީދު ވިދާޅުވިއެވެ.

އަދި ހޮނިހިރު ދުވަހު ރާއްޖެ އަނެއްކާވެސް ދިވެހި ރާއްޖޭގެ ވެރިކަން ސަލާމަތުގެ އައްސޭރިއަކަށް ގެނެސްދެއްވާނެކަމަށާއި މި އިންތިޚާބު އެއްބުރުން "ހޯދައިދޭނެ" ކަމަށް ރައީސް ނަޝީދުވިދާޅުވިއެވެ.

ރައީސް ނަޝީދު ވިދާޅުވީ ހޮނިހިރު ދުވަހު އިންތިޚާބު އެއްބުރުން ކާމިޔާބުކުރަންޖެހޭ އެންމެ ބޮޑު ސަބަބަކީ ނޮވެމްބަރު 11 ގެ ފަހުން ރާއްޖޭގެ ދުސްތޫރީ ޙުކޫމަތު ގެއްލިގެން ދާނެތީކަމާއި ގާނޫނު އަސާސީގެ ބާރާއި ސައްހަ ވެރިކަން ހަމައެކީގައި ނެތިގެން ދާނެތީކަމަށްވެސް ރައީސް ނަޝީދު ވިދާޅުވިއެވެ. އަދި ހޮނިހިރު ދުވަހަކީ ރައްޔިތުން ޤާނޫނު އަސާސީގެ ބާރުވެރިކަމާއި އެކީގައިގޮސް މި ދިވެހި ދައުލަތް ސަލާމަތް ކުރުމުގެ ފުރުސަތެއް ލިބޭ ދުވަސް ކަމުގައިވެސް ރައީސް ނަޝީދު ވިދާޅުވިއެވެ.

މީގެ އިތުރުން އެމްޑީޕީއާއި ދެކޮޅަށް ކުރަމުން ގެންދިޔަ ކަންކަމުން އެމްޑީޕީއަށް ލިބެމުން ދިޔައީ ހަގީގަތުގައި ކާމިޔާބު ކަމަށާއި ފުރަތަމަ އިންތިޚާބު ބާތިލްކުރުމުންވެސް ލިބުނީ އިތުރު ތާއީދުކަމަށް ރައީސް ނަޝީދު ވިދާޅުވިއެވެ.

"އަޅުގަނޑުމެންނަށް ފައިދާ ނުވާ ފަހިނުވާ ހަމައެއްކަމެއްނެތް، އެބޭފުޅުންނަކަށް ނުކުރެއްވޭ، ދުވަސް ދެއްވި ފުރަތަމަ އިންތިޚާބު ބާތިލްކުރެއްވި އޭގެ ނަތީޖާއަކަށްވީ ރާއްޖޭގެ ރައްޔިތުން އެބޭފުޅުންދެކެ ރުޅި އަންނާންފެށީ، ރައްޔިތުންގެ ވޯޓަށް އަރައިގަންނަތަން މާ ސާފުކޮށް ފެންނާންފެށީ، ގައުމަށްޓަކާއާއި ދީނަށްޓަކައޭ ވިދާޅުވެ ވޯޓާސް ލިސްޓްގައި ސޮއިކުރެއްވީ އެންމެފަހުންއައިސް ހަގީގަތުގައި ޖަރުމަނު ޓްއަރިސްޓް އެޖެންސީއަކުން ބުނެގެން، އަސްލަކީ ޓްއަރިސްޓް އެޖެންސީއަކުން ބުނީމައި ސޮއިކުރާންޖެހުނީ، ޑޮލަރު އަންނަން އޮތީ އެތަނުންކަމަށްވާތީވެ، އިންތިހާބުގައި ވާދަކުރަނީވެސް ޑޮރަލަށްޓަކާ" ރައީސް ނަޝީދު ވިދާޅުވިއެވެ.