ކަލައިދޫ ކައުންސިލަށް ކުރިމަތިލުމުގެ ފުރުސަތު ހުޅުވާލައިފި

އިސްދޫގެ ދެ އަވަށް ކަމަށްވާ އިސްދު އާއި ކަލައިދޫ، ވަކި ދެ ރަށެއްގެ ގޮތުގައި ހަމަޖައްސަވައި ރައީސް އަބްދުﷲ ޔާމީން އިއްޔެ ކަލައިދޫ ކައުންސިލް އުފެއްދެވުމުން އެ ރަށުގެ ކައުންސިލަށް ކުރިމަތިލުމުގެ ފުރުސަތު އިލެކްޝަންސް ކޮމިޝަނުން ރޭ ހުޅުވާލައިފި އެވެ.

ޖެނުއަރީ 18 ގައި ބާއްވާ ލޯކަލް ކައުންސިލްތަކުގެ އިންތިހާބުގައި ކަލައިދޫ ކައުންސިލަށް ކުރިމަތިލާން އެދޭ މީހުންނަށް ޑިސެމްބަރު 18 ނިޔަލަށް ވަނީ ފުރުސަތު ހުޅުވާލައިފަ އެވެ.

އާބާދީގައި ގާތްގަނޑަކަށް 1،000 މީހުން ހިމެނޭ ކަލައިދޫ ކައުންސިލަށް އިންތިހާބު ކުރަނީ ފަސް މެމްބަރުންނެވެ.

ލާމަރުކަޒީ ގާނޫނުގައި ބުނެފައިވާ ގޮތުން 3،000 މީހުންގެ އާބާދީއަކަށް ވުރެ ކުޑަ ކޮންމެ ރަށެއްގެ ކައުންސިލްގައި ފަސް މެމްބަރުން ތިބޭ އިރު، އެއަށް ވުރެ އާބާދީ ބޮޑެތި ރަށްރަށުގެ ކައުންސިލްތަކަށް އިންތިހާބުކުރާނީ ހަތް މެމްބަރުންނެވެ.

އިސްދު އާއި ކަލައިދޫ ވަކި ދެ ރަށެއްގެ ގޮތުގައި ރައީސް ހަމަޖެއްސެވީ މިދިޔަ އަންގާރަ ދުވަހު އެވެ.

ކަލައިދޫ ކައުންސިލަށް ކުރިމަތިލުމުގެ ފުރުސަތު ހުޅުވާލިއިރު، އިސްދޫ ކައުންސިލަށް ކުރިމަތިލުމުގެ ފުރުސަތު ވަނީ ކައުންސިލް އިންތިޚާބުގައި އެހެން ކައުންސިލްތަކާ އެކު ކުރިން ހުޅުވާލައިފަ އެވެ.

ޒަމާނުއްސުރެ އޮންނަ އަވަށު ވާދަވެރިކަމުގެ ސަބަބުން، 2011 ގެ ކުރިން އިސްދު އާއި ކަލައިދޫ އަވަށް ހިންގަމުން ދިޔައީ އިދާރީ ގޮތުން ދެ ތަނެއްގެ ގޮތުގަ އެވެ. އޭރު ކޮންމެ އަވަށެއްގައި އޮފީހެއް ހުރެ އެވެ. ނަމަވެސް 2011 ގެ ކައުންސިލް އިންތިހާބަށް އެ ރަށުގައި އެއް ކައުންސިލް އުފައްދައި ދެ އަވަށް އެ ކައުންސިލްގެ ދަށުން ހިންގަން ފެށި އެވެ.