އިންޑިއާގެ ތާރީޚީ ބިނާ، ތާޖްމަހަލް ބަލައިލުމަށް ފަހު ވޭނެއްގައި އެނބުރި ބެންގަލޫރަށް ދަތުރުކުރި މަގުމަތީގައި އެ އެކްސިޑެންޓް ވީ ތެޔޮ ޓޭންކަރެއްގައި ޖެހިގެންނެވެ.

އެކްސިޑެންޓްގައި ދިވެހި އާއިލާއާ އެކު ދަތުރުކުރި އިންޑިއާގެ ގައިޑް ވަނީ މަރުވެފަ އެވެ. އެކަމަކު ވޭން ޑްރައިވަރު ސަލާމަތްވި އެވެ.

ދިވެހި ދެމަފިރިންނާއި ދެ ކުދިންގެ އިތުރުން 20 އަހަރުގެ ފިރިހެން ކުއްޖަކު ދަތުރުކުރި ވޭން އެކްސިޑެންޓްވުމާ އެކު، އެ އެންމެން ވެހިކަލުން ބޭރަށް ވިއްސައިގެން ދިޔަ އެވެ.

ހަބްލީ އޮންނަނީ ދިވެހިން އުޅެމުން އަންނަ ބެންގަލޫރާ ގާތްގަނޑަކަށް 415 ކިލޯމީޓަރު ދުރުގަ އެވެ. ކާރުގައި ދަތުރުކުރާ ނަމަ އެހިސާބުން ބެންގަލޫރަށް ދާން ގާތްގަނޑަކަށް ފަސް ގަޑިއިރު ނަގާނެ ކަމަށް ބެލެވެ އެވެ.

އެ އާއިލާ ކައިރިއަށް އަދި އެއްވެސް ދިވެއްސަކު އަދި ނުދެ އެވެ. އަދި ދިވެހިންނަކީ ކޮން ބައެއް ކަމާއި ރާއްޖެ އަކީ ކޮން ގައުމެއްކަން ވެސް ހޮސްޕިޓަލްގެ މީހުންނަށް ނޭނގެ އެވެ.

ފޮރިން މިނިސްޓްރީގެ އޮފިޝަލަކު ވިދާޅުވި ގޮތުގައި އިންޑިއާގެ ނިއު ދިއްލީގައި ހުރި ރާއްޖޭގެ ހައި ކޮމިޝަން ނުވަތަ ޓްރިވެންޑްރަމްގައި ހުރި ކޮންސިއުލާ އިން ވީހާވެސް އަވަހަކަށް މީހަކު އެ ހިސާބަށް ފޮނުވޭތޯ އަންނަނީ މަސައްކަތްކުރަމުންނެވެ.

"އަދި ނޭނގޭ ކޮން ދިމާލަކުން ކަމެއް ދާނީ. އެ މަސައްކަތް އަންނަނީ ކުރަމުން،" އޮފިޝަލް ވިދާޅުވި އެވެ.

ވިވެކް ނަންދާ ޖެނެރަލް ހޮސްޕިޓަލްގައި ފަރުވާ ދެމުން އާއިލާ އަށް ސަރުކާރުން އެހީތެރިކަން ފޯރުކޮށްދޭނީ އާސަންދައިގެ ދަށުން ކަމަށް ސަރުކާރުން ބުނެ އެވެ.

އެންމެ ބޮޑު އަނިޔާއެއް ލިބުނު ހަތަރު އަހަރުގެ އަންހެން ކުއްޖާގެ ބޮލާއި މޫނުގެ ބައެއް ވަނީ ވަރަށް ބޮޑަށް ކަފައިގެން ގޮހެވެ. އެ ކުއްޖާގެ އޮޕަރޭޝަން ކުރީ ރޭގަ އެވެ. އެކަމަކު އޭނާގެ ހާލު އެހާ ރަނގަޅު ނޫން ކަމުން އަދިވެސް އޮތީ އައިސީޔޫގަ އެވެ.

"އޮޕަރޭޝަނަށް ބޯ ބޭލިއިރު ބޮލަށް ހުރި ފުޅިތޮށިތައް ވަދެފައި،" ކުއްޖާގެ މަންމަ އައިމިނަތު ޝިރުމީނާ ބުންޏެވެ.

އެކްސިޑެންޓްގައި އޭނާގެ 20 އަހަރުގެ ފިރިހެން ކޮއްކޮގެ އެއް ކަންފަތް ވަނީ ނެއްޓިފަ އެވެ. ޝިރުމީނާގެ ގާތްގަނޑަކަށް ތިން އަހަރުގެ ފިރިހެން ދަރިފުޅުގެ ބޯ ފެޅުން ނޫން އަނިޔާއެއް ނުލިބި ވަނީ ސަލާމަތްވެފަ އެވެ.

"ހުރިހާ އެންމެން ވެސް އެކަހަލަ ގޮތެއް. ވަކި ގޯހެއް ވެސް ނުވޭ. ރަނގަޅެއް ވެސް ނުވޭ،" އޭނާ ބުންޏެވެ.

"އަޅުގަނޑު މި ހުންނަނީ ހުރިހާ ކަމެއް ވެސް ރަނގަޅަށް ދާނެ ކަމަށް ދުއާކޮށްކޮށް."

އޭނާގެ ކޮއްކޮގެ ކަންފަތުގެ އޮޕަރޭޝަން ކުރަން އޮތީ މާދަމާ އެވެ. މިއަދު އެ އޮޕަރޭޝަން ނުކުރެވުނީ އެކަމަށް ޚާއްސަ ޑޮކްޓަރު މިއަދު ހޮސްޕިޓަލްގައި ނެތުމުން ކަމަށް އޭނާ ބުންޏެވެ.

ފިރިހެން ދަރިފުޅުގެ ލޮލުގެ ފަރުވާއަކަށް ޓްރިވެންޑްރަމަށް ދިޔަ އާއިލާ އިން ތާޖް މަހަލް ބަލައިލަން ދަތުކުރީ ޓްރިވެންޑްރަމުން ބެންގަލޫރަށް މަތިން ދަތުރުކޮށް، ބެންގަލޫރުން ވޭނެއް ނަގައިގެންނެވެ.

އެމީހުން ރާއްޖެ އަންނަން ޓިކެޓް ނަގާފައި އޮތީ އަންނަ ހުކުރުދުވަހަށެވެ.

ޝިރުމީނާ ބުނި ގޮތުގައި އެމީހުންގެ އަތުގައި ހުރި ފައިސާ އާއި ބައެއް ލިއުންތައް ވަނީ ގެއްލިފަ އެވެ. އާއިލާ އަށް އެހީތެރިވެދިނުމަށް އޭނާ ވަނީ ދިވެހިންގެ ކިބައިން އެދިފަ އެވެ.