ހައްދުންމަތީ ކަލައިދޫއަކީ، ހައްދުންމަތީ އިސްދޫއާ ވަކިން އޮންނަ، މީހުން ދިރިއުޅޭ ވަކި ރަށެއްގެ ގޮތުގައި ރައީސުލްޖުމްހޫރިއްޔާގެ ޤަރާރަކުން ކަނޑައަޅުއްވައި، ކަލައިދޫ ކައުންސިލް އުފެއްދެވުމުން، އިސްދޫ ކައުންސިލަށް ކުރިމަތިލުމުގެ މުއްދަތު އިލެކްޝަންސް ކޮމިޝަނުން އިތުރުކޮށްދީފި އެވެ.

މުއްދަތު އިތުރުކޮށް އިލެކްޝަންސް ކޮމިޝަނުން ކުރި އިއުލާނެއްގައި ބުނެފައިވަނީ ލޯކަލް ކައުންސިލްތަކުގެ އިންތިޚާބަށް ކުރިމަތިލުމުގެ ފުރުސަތު ހުޅުވާލައިފައިވަނިކޮށް، ހައްދުންމަތި ކަލައިދޫއަކީ ހައްދުންމަތި އިސްދޫއާ ވަކިން އޮންނަ މީހުން ދިރިއުޅޭ ވަކި ރަށެއްގެ ގޮތުގައި ކަނޑައަޅުއްވައި، ހައްދުމަތީ ކަލައިދޫ ކައުންސިލް ރައީސުލްޖުމްހޫރިއްޔާ އުފައްދަވައިފައިވާތީ، ލ.އިސްދޫ ކައުންސިލަށް ކުރިމަތިލުމަށް އިތުރު ވަގުތު ބޭނުންވާކަމަށް އިސްދޫ ކައުންސިލުން ހުށަހަޅައިފައިވާތީ، މިމަހުގެ 18އަށް މުއްދަތު އިތުރު ކޮށްފައިވާކަމަށެވެ.

މީގެކުރިން އިލެކްޝަންސް ކޮމިޝަނުން ވަނީ ކަލައިދޫ ކައުންސިލަށް ކުރިމަތިލުމުގެ ފުރުސަތު ހުޅުވާލާފަ އެވެ.

ހައްދުންމަތީ ކަލައިދޫއަކީ، ހައްދުންމަތީ އިސްދޫއާ ވަކިން އޮންނަ، މީހުން ދިރިއުޅޭ ވަކި ރަށެއްގެ ގޮތުގައި ރައީސުލްޖުމްހޫރިއްޔާގެ ޤަރާރަކުން ހަމަޖައްސަވައިފައިވަނީ ޑިސެމްބަރު 3 ވަނަ ދުވަހުގަ އެވެ.

އާބާދީގައި ގާތްގަނޑަކަށް 1،500 މީހުން ދިރިއުޅޭ އިސްދޫ އާއި، އާބާދީގައި ގާތްގަނޑަކަށް 1000 މީހުން ދިރިއުޅޭ ކަލައިދޫ ކުރިން ދެ އަވަށެއްގެ ގޮތުގައި އޮތުމުގެ ސަބަބުން ދެ އަވަށަށް އޮންނަނީ އެންމެ ކައުންސިލެކެއެވެ.

ދެ އަވަށެއްގެ ގޮތުގައި އޮންނަ އިސްދޫ ކަލައިދޫގެ ރައްޔިތުންގެ މެދުގައި މީގެކުރިން ވަނީ ބޮޑެތި ހަމަނުޖެހުންތަކެއް ހިނގާފަ އެވެ. އެގޮތުން 2008 ވަނަ އަހަރު ދެ އަވަށުގެ ދެމެދުގައި ކޯރު ކޮނުމުން ސިއްހީ ހިދުމަތް ދުވަސްގަނޑަކަށް މެދު ކެނޑިފައިވާކަން ފާހަގަކޮށްލެވެ އެވެ.