ގިރިފުށި ޓްރެއިނިންގ ސެންޓަރގައި ދެ ދުވަހުގެ މުއްދަތަށް ހިންގުނު ޔޫތް ލީޑަރޝިޕް ޕްރޮގްރާމް 2013 އިއްޔެ ނިންމާލައިފިއެވެ.

ޑިމޮކްރަސީ ހައުސްގެ ފަރާތުން ރާއްޖޭގެ ހުރިހާ އަތޮޅުތަކަކުން ހޮވާލެވޭ ކުދިން ބައިވެރިކޮށްގެން، އަހަރަކު އެއްފަހަރު ހިންގަމުން ގެންދާ މި ޕްރޮގްރާމްގެދަށުން ގިރިފުށީގައި ހިންގުނު މިކޭމްޕްގައި ބައިވެރިންނަށް މޮޑަން ލީޑަރޝިޕްގެ ކޮންސެޕްޓްތައް ދަސްކޮށްދިނުމާއި، އަމިއްލަ ނަފްސްގައި ހުރި ރަނގަޅު ކަންތައްތަކާއި ނުރަނގަޅު ކަންތައްތައް ދެނެގަންނާނެގޮތް ދަސްކޮށްދިނުމާއި، ޓީމް ބިލްޑިންގ ޙަރަކާތްތަކުގެ ތެރެއިން ޓީމެއްގެ ތެރޭގައި އެކުވެރިކަމާއި، ފޯރި އާއި ޖޯޝް ގެންނާނެ ގޮތްތައް ދަސްކޮށްދިނުމާއި، އަދި ފަރުދީ ޙައިސިއްޔަތުން ތިމާގެ ގައިގައި ހުންނަންޖެހޭ އަޚްލާޤީ މިންގަނޑުތަކާއި، ސުލޫކީ މިންގަނޑުތައް ދަސްކޮށްދީފައިވެއެވެ.

ޑިމޮކްރަސީ ހައުސްގެ ފަރާތުން ހިންގަމުންދާ މި ޕްރޮގްރާމްގެ ބައިވެރިންނަށް އަމާޒުކޮށްގެން 2010 ވަނަ އަހަރުން ފެށިގެން އެމްއެންޑީއެފްގެ ފަރާތުން ''ލީޑަރޝިޕް ކޭމްޕް'' ގެ ނަމުގައި 2 ދުވަހުގެ ޓްރޭނިންގ ޕްރޮގްރާމެއް އަންނަނީ ހިންގަމުންނެވެ.

މި އަހަރު މިހިންގުނު ކޭމްޕްގައި 40 ބައިވެރިންނާއި، ޑިމޮކްރަސީ ހައުސްގެ ފަރާތުން 4 ކޯޑިނޭޓަރުންނާއި، ވީޑިއޯ ގްރާފަރެއްވަނީ ޙަރަކާތްތެރިވެފައެވެ.