ހަމަދު ބިން ޚަލީފާ އާލްޘާނީ ސްކޫލްގެ އިސްދަރިވަރުންގެ ޖަމިއްޔާ - ހަމަދު އިންކަލައިން ޔޫތު އެސޯސިއޭޝަނުން އިންތިޒާމުކޮށް ގެވެށި އަނިޔާ އާއި ދެކޮޅަށް ހިންގާ "ތިނަކުން އެކެއް" ކެމްޕޭން މިއަދު ހަވީރު ލ. ގަމުގައި ފަށާނެކަމަށް އެ ޖަމިއްޔާއިން ބުނެފިއެވެ.

ޙަމަދު އިންކްލައިން ޔޫތު އެސޯސިއޭޝަން - ހިޔާ އިން ބުނީ ގެވެށި އަނިޔާ ހުއްޓުވުމަށް ހިންގާ މި ހަރަކާތްތަކުގެ ފެށުން މިއަދު ހަވީރު ލ. ގަން އާބާދު ސަރަޙައްދުގައި ހުންނަ ކުޅިވަރު އެކުވަނީގައި އޮންނާނެ ކަމަށެވެ. އެހެންކަމުން މި ހަރަކާތުގައި ބައިވެރިވެލެއްވުމަށް ވީހާވެސް ގިނަބޭފުޅުން މިއަދު ހަވީރު 04:00 އަށް އެ ސަރަހައްދަށް އޮރެންޖު ކުލައިގެ ހެދުމެއް ތުރުކުރައްވައިގެން ވަޑައިގެންނެވުމަށް ދަޢުވަތު އަރުވައެވެ.

އަންހެނުންނަށް ކުރާ އަނިޔާއާއި ދެކޮޅަށް ހިންގާ ކެމްޕޭންގެ 16 ދުވަހަކީ 1991 ގައި އަންހެން ކުދިންނާއި އަންހެނުންނަށް ކުރާ އަނިޔާއާއި އިންސާނީ ޙައްޤުތަކާއިމެދު މީހުން ލޯހުޅުވައިދީ ހޭލުންތެރިކަން އިތުރުކުރުމުގެ ގޮތުން ބައިނަލްއަޤްވާމީ ހިންގަން ފެއްޓި ކެމްޕޭނެކެވެ. އަންހެނުންނަށްކުރާ އަނިޔާ ހުއްޓުވުމަށް މި ކެމްޕޭން ފެއްޓީ 'ގޯގް' އާއި އދ.އާއި ސަރުކާރުގެ މުވައްސަސާތަކާއި އަމިއްލަ ޖަމިއްޔާތަކާއި، އަމިއްލަ ފަރުދުންނާއި މީޑިއާ އަދި ހެޔޮއެދޭ ފަރާތްތައް ގުޅިގެން 25 ނޮވެމްބަރު 2010 ގައެވެ.

މި އަހަރަުގެ ކެމްޕޭން އަމާޒުކުރަނީ އަނިޔާ ހުއްޓުވުމުގައި، އަނިޔާކުރާ މީހުންނާއި ފިރިހެނުންގެ ދައުރަށެވެ. މީގެ އިތުރުން މިއީ އަދަބު ކަނޑައެޅިފައިވާ ބޮޑުކުށެއްކަން އަންގައިދިނުމަށެވެ. ހަމަ އެއާއިއެކު ގެވެށި އަނިޔާގެ ސަބަބުން އާއިލާތަކާއި މުޖުތަމަޢު އަށް ކުރާ ނޭދެވޭ އަސަރުތަކަށެވެ. އަދި އަސަރުކުރާ  ގޮތްތަކަށް އަލިއަޅުވައިލުމަށެވެ.